Адет яз, чи жегьилар юкьван мектеб куьтягьайла, мукай акъадарай шарагар хьиз, гьарма саниз акъатда. Садбур фадлай чпи ­хкяна, лишандик кутунвай кIелдай чкайриз, муькуьбур кIвалахар ийиз яргъариз, ярар — дустарин, я та­хьайтIа мукьвабурунни  танишрин патарив фида. Гьа икI, 11 йисуз санал чIехи хьайибур кьисметри, сад-садавай чара авуна, яргъариз акъудда. Гзаф вахтара сад-садаз такваз, цIигел жеда.

Вахтарилай, йисарилай чеб-чпел дуьшуьш хьайила, шадвилерин а кьил жедач… Ингье и йикъара, чпи 1979-йисуз Курхуьруьн юкь­ван мектеб акьалтIарай 22-выпускдин жегьилар (виликамаз меслят хьана), яргъарайни хтана, чпин шадвилин гуьруьшдиз кIватI хьана. Ам гьакъикъатдани яргъалди рикIел аламукьдай мярекатдиз элкъвена.

И кар рикIел атана, тешкилай  Муталибов Шидадулагьан меслятдалди  тайинарнавай  вахтунда  чпи кIелай мектебдин патав кIватI хьана. Абуруз тарсар гайи муаллимрикайни са шумуд атанвай.

Мярекат Гуьлгери вацIун къерехда авай “Куьре” ресторанда кьиле фена. Ина тIебиатди ганвай гуьрчегвилихъ галаз сад хьиз, и ида­радин иесийрини къулай шар­тIар яратмишнава. Экуь, гуьзел залда суф­райрихъ вирида чкаяр кьуна. Мярекат кьиле тухун школада биологиядин тарсар гайи муаллим Шихбабаев Шихбубадин хиве туна. Сифте гаф тарихдин тарсарин муаллим С.Алиеваз, ахпани и цIара­рин автордиз гана. Абуру шад мярекат виридаз мубаракна. Ам тешкилайбуруз чухсагъул лагьана.

— Къе ина школа акьалтIарай 45 касди иштиракзава. Гзаф яргъара авайбур  агакьнач. Ихьтин мярекатар, яргъал хьайитIани, уьмуьрда са шумудра кьиле тухун хъсан кар я, чун — чаз аквазва, мукьва жезва.  Гьа са вахтунда чаз санал са мектебда кIелай накьан аялрин кьисметар гьихьтинбур хьанатIа, вуж вуч кеспидин иеси хьанатIа, хизан, хуьр-кIвал, Ватан патал вуч алакь­на­тIа чир жезва, — къейдна муаллимри.

Шад мярекатдал выпускни­крикай Э.Агъамирзоев, А.Саидов, Р.Али­вердиев,Р. Рустамов, Т.Ва­гьа­бов, Н.Магьмудов, С.Сийибулаев ва масабурни рахана.

— Чун гзаф шад я къе ачух суфрайрихъ шадвилинни дуствилин мярекат кьиле тухунал. Чна чи аялвилин, мектебдин вахтар рикIел хкана. Къенин юкъуз вуж гьихьтин кеспидин иеси хьанватIа, нелай вуч алакьнатIа чир хьана, сада-садаз дуствилин меслятарни гана. Гележегда ихьтин  мярекатар тухун чаз хъсан адет жеда, — къейдна гуьруьшдин иштиракчийри.

Шад мярекат тIвар-ван авай манидар Н.Саругъланова манияр лугьуналди, вирида кьуьлер авуналди мадни гурлу хьана. Шадвилер яргъалди давам  хьана.

Райсудин Набиев