Дербент шегьердин кьилин везифаяр вахтуналди тамамарзавай Энрик Муслимов газ квай чехирар гьазурдай цIийи карханадиз — “Дербентдин чехирринни коньякрин завод” ООО-диз фена. Идан гьакъиндай “Лезги газетдиз” шегьердин администрациядин пресс-къуллугъдай хабар гана.
Энрик Муслимоваз карханада производстводин кIвалах тешкилнавай гьалдикай суьгьбетна, ахпа ам цехра къекъвена.
Энрик Муслимова къейд авурвал, завод ачухуни кIвалахдин алава чкаяр тешкилдай, шегьердин, региондин ва федеральный бюджетриз налогрин ва маса пулар чара ийидай мумкинвал гузва. Идалай гъейри, Дербентдин ва патарив гвай районрин майишатрин иесийрал битмишарнавай ципицIрин бегьер маса гунихъ галаз алакъалу яз четинвилер ацалт хъийидач. ГьикI лагьайтIа, завод патал са пай хаммал кьилдин ксарин майишатривай маса къачуда. Шегьердин администрацияди Дербентдин мулкунал кардик квай ихьтин производствойрин тереф, са шакни алачиз, хуьда.
“Дербентдин чехирар гьазурдай компания” ООО-дин генеральный директор Эмил Омарован гафаралди, эвел кьилера ина йиса 5 миллион бутылка шампанский чехирар акъудда. И кьадар продукция гьасилун патал 5 агъзур тонн хаммал герек я. Заводдихъ са агъзур гектардин уьзуьмлухар ава, абурукай 300 гектар бегьердал атанвайбур я. Гележегда ципицIар битмишарун патал 2 агъзур гектардилай виниз майданар чара ийидайвал я. Ида кархана тамамвилелди хсуси хаммалдалди таъминардай мумкинвал гуда. Йисан къене гьасилдай чехирдин кьадар 20 миллион бутылкадив агакьардай фикир ава.
“Дербент — Агро” ООО-дин генеральный директор Рамиз Къагьриманова къейд авурвал, кархана алай аямдин технологийрин бинедаллаз эцигнава. Ам лап цIийи жуьрейрин, асул-гьисабдай Италияда акъуднавай тадаракралди таъминарнава. ЦипицIар гьялунин ва хуьнин цIийи къайдаяр ишлемишуни виниз тир еридин чехирар гьазурдай мумкинвал гуда.
Заводда кIвалахдин саки 70 чка тешкилнава. Уьзуьмлухра зегьмет чIугвадайбурни кваз саки 2 агъзур касдиз кIвалахдин чкаяр тешкилда. Дербентдиз желбнавай инвестицийрин кьадар, санлай къачурла, саки 2 миллиард манатдив агакьнава.
Гележегда — 2020-йисалди чехирар гьасилдай кластер арадал гъун ва 2 агъзур гектарда уьзуьмлухар кутун фикирдиз къачунва. 2017-йисуз налогрин пулар яз — 2019 агъзур манат, гьа гьисабдай НДС-274 агъзур манат, НДФЛ-100 агъзур манат, страховой взносар — 314 агъзур манат, чилин налог 1331 агъзур манат чара авуна.
Гуьруьшдин эхирдай Энрик Муслимова “Дербентдин чехирринни коньякрин завод” ООО-дин генеральный директор Рамиз Къагьримановав карчивилин кIвалах вилик тухуник пай кутунай РД-дин карчивилин ва инвестицийрин рекьяй Агентстводин патай Гьуьрметдин грамота вахкана.
«Лезги газет»
