Махачкъалада, Дуствилин кIвале, 22-июлдиз Дагъустандин премьер-министр Абдулмуслим Абдулмуслимованни Узбекистандин Бухара областдин гьаким Ботир Зарипован гуьруьш кьиле фена. Ана кьве региондин министерствойрин векилрини иштиракна.
Терефри алишверишдинни экономикадин, илимдинни техникадин, яшайишдинни медениятдин хилера алакъаяр мягькемарунин, кьилди къачуртIа, промышленностдин, агропромышленностдин комплексдин ва маса хилериз талукь месэлаяр веревирдна. Гзаф фикир туризм вилик тухунизни гана.
Абдулмуслим Абдулмуслимова Бухара областдин гьаким Дагъустандиз атун тебрикна. Вичин рахунра ада шуьшедин чIунарикай авунвай парча акъуддай Россиядинни Узбекистандин кархана ачухиз гьазурзавайдакай хабар гана.
«Алай вахтунда Россиядинни Узбекистандин саналди тир «Асадбег Гласс Файбер» кархана эцигунин кIвалахар эхирдиз къвезва. 2024-йисан сентябрдиз ам ачухдайвал я. Дагъустандин патай Каспийскдин шуьшедин чIунарин заводди проектдик 50 миллион манатдин инвестицияр, узбекви амадагри 47 миллион манат кутунва. Им чи амадагвилин сад лагьай проект я. Ада кьве терефдизни яшайишдин, экономикадин рекьяй хийир гъида», — къейдна А.Абдулмуслимова.
Дагъустандин премьер-министрди мадни Махачкъалада алишверишдин еке «Узбекистан» кIвал ачухиз кIанзавайдакайни хабар гана. Ана гзафни-гзаф памбагдихъ ва сарихъ галаз алакъалу производстводин суьрсет жеда.
«Чи республикада пуд миллиондилай виниз агьалияр яшамиш жезва. Гьар йисуз къвезвай туристрин кьадарни 2 миллиондив кьван агакьзава. Эгер памбагдин ва сун шейэр маса гудай алишверишдин кIвал республикада ачухайтIа, гзафбуруз хийир жеда. Мумкин я, алишверишдин ихьтин кIвал Бухарадин стха шегьер тир Дербентдани ачухда», — лагьана А.Абдулмуслимова.
Ботир Зарипова, Дагъустандин премьер-министрдин гафарин тереф хуьналди, чебни Дагъустанда алишверишдин кIвал ачухунал рази тирдакай лагьана ва эцигдай идарадиз «Made in Bukhara» тIвар гун теклифна.
РД-дин туризмдин ва халкьдин художественный сеняткарвилерин министр Эмин Мерданова Узбекистандай атанвай мугьманриз Каспий гьуьлуьн къерехда тешкилиз кIанзавай туризмдиз талукь проектдикай ихтилатна. Адан гафаралди, кластердин мулкуна 13,5 агъзур касдиз чка жедай 28 мугьманхана, инсанриз тIуьнар гудай чкаяр, санаторияр ва маса дараматар жеда. Мугьманханайрин 60 процент 3, гъетрен, ва 40 процентни 4 ва 5, гъетренбур, жеда.
Абдулмуслим Абдулмуслимова Бухара областдин векилриз Каспий гьуьлуьн кьере тешкилзавай кластерда «Бухара» тIвар алаз чпин комплекс ачухун теклифна.
Гуьруьшдилай гуьгъуьниз Дагъустандин Гьукуматдин Председатель Ботир Зарипов, Узбекистандай атанвай маса мугьманарни галаз Дагъустандин промышленный карханайриз фена. Абурун арада керамикадин плитаяр акъуддай «Керамогранит Дагестан» АО, «Салаватстекло Каспий», Каспийскдин шуьшедин чIунарин завод авай. Делегациядиз экскурсия тешкилна, мугьманриз карханайрин кIвалахдикай суьгьбетна.
«Дагъустан Республикадин промышленность алай аямдив кьадайвал авун» подпрограммадин ва «Промышленность вилик тухун» госпрограммадин гьисабдай «Керамогранит Дагестан» АО-диз вичи ийизвай харжарин са пай эвез хъувун патал субсидия ганва. И пуларихъ карханади герек машинар маса къачуда.
2023-йисуз АО-дин коллективди 992,7 миллион манат къазанмишна. Госбюджетдиз 160 миллион манат налогар гана.
Алай вахтунда заводда производстводин цехар гегьеншардай инвестпроект уьмуьрдиз кечирмишзава. Ам 2026-йисалди давам жеда. Карханада керамогранитдин плиткаяр акъуддай цIийи линия кардик кутада. Идахъ галаз алакъалу яз, акъудзавай продукциядин кьадарни артух жеда. Инвестпроект кьилиз акъудун патал карханади 1,7 миллиард манат ишлемишда. Ида кIвалахдай алава 100 чка арадал гъидай мумкинвал гуда.
Узбекистандин делегацияди Дагъустандин Гьукуматдин кьиле авайбурухъ ва карханадин векилрихъ галаз санал кIвалахунин, тежриба чирунин гьакъиндайни ихтилат авуна.
Хийир Эмиров
