США къаришмиш жезва
Россиядин Президент Владимир Путина NBC News каналдин журналистдин суалриз жавабар гудайла къейдна хьи, США гьамиша Россиядин сечкийрик къаришмиш жезва. “Чна США-дин векилриз лугьузва: “Куьн гьамиша чи сиясатдин месэлайрик къаришмиш жезва”. Абуру гьатта и кар инкарни ийизвач”, — къейдна В.Путина.
Россиядин Президентди кьетlендаказ лагьана хьи, США-дин сечкийрик Москва къаришмиш жезвач. “Чахъ чи къенепатан крарик хкуькьдай ихтиярар тагуникай ибарат къайдаяр ава. Чунни масабурун крарик къаришмиш жезвач. Чна чи вилик сечкийрик къаришмиш хьунихъ галаз алакъалу макьсадар эцигзавач. Ша чна чи вилик къаришмиш хьунин макьсад эцигнавай хьиз фикирин. Вуч паталди? Вучтин макьсаддалди?”.
Идалайни гъейри, В.Путина Россиядинни Америкадин арада алакъаяр чlур хьунай жавабдарвал США-дин хиве туна.
Буйдиз кьакьан гада
Великобританияда виридалайни кьакьан буй авай гада яз гьисабзавай Брэндон Маршалла Уэльсдин баскетболдин милли дестеда вердишвилер къачуз эгечlнава. Идан гьакъиндай “Daily Mail” чешмеди хабар гузва.
Кlуьд йис тамам хьайила, ам фад-фад чlехи жез хьана. Цlипуд йисан яшда авайла, адан кьакьанвал 183 сантиметрдив агакьна. Алай вахтунда 16 йис тамам хьанвай Брэндонан буйдин кьакьанвал 224 сантиметр я ва, пешекаррин фикирдалди, кьакьан хьун давам жеда.
Адетдинди тушир кьакьанвал себеб яз, Брэндон бязи четинвилерални ацалтзава. Адаз вичин буйдив кьадай парталар, иллаки кlвачин къапар жагъурун четин жезва. Идалай гъейри, ам гзаф рахадай ашкъи авачирди ва вичел дикъет желбиз кlан тийидайди я. Гиннессан рекордрин Ктабдал асаслу яз, дуьньяда виридалайни кьакьан жегьил гада вичин буйдал 234 сантиметр алай америкави Брок Браун яз гьисабзавай. Алатай йисан делилралди, дуьньяда виридалайни кьакьан итимдал 251 сантиметр ала.
Депутат гатана
Киевда парк эцигунин кардиз акси акция кьиле фейи вахтунда фракциядик квачир Верховный Рададин депутат Юрий Левченко гатана. Идан гьакъиндай “Хабарар” РИА-ди малумарзава.
Агьвалат акур шагьидрин гафаралди, Киевсоветдин депутат Святослав Кунтяканни Левченко кьиле аваз аксивалзавайбурун арада хьайи къалмакъал кукlунриз элкъвена. Идан гьакъиндай Кунтяка “Facebook” соцсетда авай вичин чина кхьена. Чиновникди малумарайвал, Кличкодин терефдарри Левченкодин чиниз гъвечlи баллондай са шумуд сеферда газ хъичена ва вич-вичивай квахьдалди гатана, гуьгъуьнлай депутат азарханадиз рекье туна. Киевдин полициядин векилрин делилралди, къалмакъал къанунсуздаказ эцигнаваз гьисабзавай гаражар чукlурдайла арадал атана. Полициядин къуллугъчийри къейднавайвал, чуьруькдик Левченкодини Кунтяка чпи кьил кутуна.
Автомобилди хвена
США-да къати гар акъатай вахтунда, эгер патав гвай машинди манийвалначиртlа, еке тар кlвалин юкьвал аватун мумкин тир. Идан гьакъиндай “CBS News” чешмеди хабар гузва. Уэйрхем шегьердин агьали Глен Шарпа ихтилатзавайвал, 2-мартдиз ам шегьердин къерехда яшамиш жезвай дидедал кьил чlугваз фена ва машин шамагъаж тарцин патав акъвазарна.
Къати гар акъатай вахтунда ярх хьайи тарцин агъа кьил машиндал аватуникди, кlвалин къавал аватай вини паюни кlвалевайбуруз зарар ганач.
“Ахьтин кlеви ван акъатнай хьи, заз кlвал хъиткьинай хьиз хьанай”, — ихтилатна адан дидеди. “Эгер за машин маса чкадал акъвазарнайтlа, дидедизни вахаз хасаратвилер жедай, гьатта рекьидай чкадал атунни мумкин тир”, — къейдна Г.Шарпа.
Тар аватун мумкин тир чкадал дишегьлияр ксанвай утагъ алай. Шарпаз гила машин туькlуьр хъийидай ва я тахьайтlа цlийиди къачудай фикир ава. “Машин анал акъвазарна лугьуз, зун гзаф шад я” — алава хъувуна иесиди.
Нетижасуз гьужум
Сирияда боевикар Россиядин Хмеймим авиабазадал пилот галачир аппаратдин куьмекдалди гьужум ийиз алахъна. Идан гьакъиндай “Al-Masdar News” чешмеди хабар гузва.
Малумарзавайвал, хъиткьиндай затlарив ацlанвай, пилот галачиз лув гудай аппарат, базадин сергьятрив агакь тавунмаз, ПВО-дин системадин куьмекдалди тергна, адавай са гьихьтин ятlани зиян гуз хьанач. Хъиткьиндай затlарив ацlанвай аппарат кьилди гьи дестединди ятlа гьеле тестикьариз хьанвач.
Идалай вилик Сирияда авай Россиядин военный объектрал гьужум авур дуьшуьш 6-январдин йифен вахтунда хьанай. А чlавузни гъилеривди туькlуьрнавай бомбайрив ацlанвай 13 аппаратди Россиядин Хмеймим авиабазадал ва Сириядин Тартус шегьерда авай ВМФ-дин базадал гьужумнай. Абурукай ирид “Панцирь-С” комплексдин куьмекдалди барбатlнай, муькуь ругуд лагьайтlа, Россиядин радиоэлектронный женгинин подразделениди кьунай.
Гьазурайди — Куругъли Ферзалиев
