21-февралдиз СтIал Сулейманан рай­онда лезги­ чIа­лан месэлайриз талукьарнавай илимдинни тежрибадин 12-конференция кьиле фена. ЦIи ам Дагъус­тандин халкьдин шаир СтIал Сулейманан 155 йисан юбилейдиз талукьарнавай.

Конференция гатIундалди вилик рес­публикадин жуьреба-жуьре районрайни шегьеррай хтанвай мугьманар Гьажи Давуд­ Ширвандин хан яз тестикь хьайидалай инихъ 300 йис тамам хьуниз бахшнавай, Ме­лик-Мамед Агъабалаева янавай шикилрин выставкадиз килигна.

Гуьгъуьнлай вири конференция кьиле­ физвай залдиз фена. Меде­ниятдин макан­дин фойеда­, залда авай XX асирдин Гомеран­ ­уьмуьрдинни яратми­шун­рин рекьиз, лез­ги чIа­лаз, милли меде­ни­ят­диз­, халкь­дин адет­риз талукьарнавай стенд­­­ри, жуьреба-жуьре экспонатри чпел фикир желбзавай.

Конференция райондин кьил Саид Темирханова ачухна. Ада, иштиракчийриз Дидед чIа­лан международный югъ мубаракна, мярекатдин асул макьсадрикай, адахъ авай метлебдикай ихтилатна. Гуь­гъуьнлай лезги чIалан месэлайриз талукьарнавай докладар гваз «Лезги га­зетдин» кьилин редактор Мегьамед Ибрагьимов, Дагъустандин халкьдин артистка­ Фаризат Зейналова, СтIал Су­лейманан КIва­лин-музейдин илимдин къуллугъчи Фей­зудин Мамедов, Да­гъустандин писател­рин Союздин лезги секциядин регьбер Максим Алимов, Тахо-Годидин тIвар­цIихъ га­лай ин­ститутдин илимдин къуллугъчи Жак­лина Мейланова, «Дагъустан» РГВК-да эфирдиз акъатзавай «Вахтар ва инсанар» передача тухузвай Владик Батманов, филологиядин илимрин кандидат Азиз Мирзебегов, «ССР» ООО-дин генеральный директор Навои Бутаев, лезги чIалан муаллим, ша­ир Гъулангерек Ибрагьимова, Мегьарамдхуьруьн школа-интернатдин директордин заместитель Алау­дин Саидов, Алкьвадар Гьасанан музейдин директор Гьуьсейн Гьуьсейнов ва масабур рахана. Абурун докладрин арада мектебра кIелзавай аялри — конкурсрин гъалибчийри — СтIал Сулейманан шиирар кIелна.

Гьар йисуз адет хьанвайвал, цIини мергьяматлувилин «Умуд» фондунин патай анин директор Савин Велиева хайи чIал хуьнин макьсаддалди районда кьиле тухвай­ конкурсрин, олимпиадайрин гъалибчийрив — муаллимривни аялрив, мектебрин коллективрив пулдин пишкешарни гьуьрметдин грамотаяр вахкана. Ада гьакIни фондунин тешкилатчи, РД-дин Халкьдин­ Собранидин депутат Имам Яралиеван патай конференциядин иштиракчийриз чIалан сувар мубаракна ва фондуни идалай кьулухъни хайи чIал хуьник пай кутазвайбурун зегьметар пул­дин пишкешралди къейддайдакай лагьана.

Агьмед  Магьмудов