Эхиримжи варцара редакциядин почтадиз аялриз гузвай пулариз талукь яз чарар, зенгер гзаф къвезва. Чна абурукай садни фикир тагана тазвайди туш. Чаз и карда Дагъустандин Пенсийрин фондунин къуллугъчийри куьмекзава, лазим малуматар ва делилар гъиле-гъилди агакьарзава. Сагърай чеб!
Къенин ихтилат 10 агъзур манат пуд лагьай сеферда гузва лугьуникай физва. Пулдин и такьатар соцсетрани гзаф веревирдзава. Чна и малуматдин кIан-пун ахтармишун, газет кIелзавайбурун суалриз жавабар жагъурун патал Дагъустандин Пенсийрин фондуниз чар рекье туна. Малум хьайивал, и пул гузва, амма виридаз — ваъ.
Россиядин Пенсийрин фондунин Дагъустанда авай отделенидин пенсияр тайинардай ва цIийи кьилелай гьахъ-гьисаб ийидай отделдин начальник Патимат Абдурагьмановади къейд авурвал, 10 агъзур манатдин кьадарда аваз пуд лагьай сеферда гузвай алава пулар авач. Алай вахтунда 10 агъзур манатдин кьадарда аваз алава пулар 2017-йисан тайин пуд вацра (июлдиз, августдиз ва сентябрдиз) дидедиз хьанвай, яни алай йисан и варцара 3 йис тамам жезвай аялриз гузва. Амайбуруз — ваъ.
И пул къачун патал дидеди ва бубади (анжах са касди) “Госкъуллугъ” порталда 30-сентябрдалди арза гун лазим я. Амни аял ханвай вацран эвел кьиляй, яни аялдин 3 йис тамам жезвай вацра гайитIа жезва.
— Августдин вацра 10 агъзур манат гуникай малумат “Госкъуллугъ” порталда раижнава. Амма гзафбур идан гьакъиндай дуьз гъавурда акьунвач. Гьавиляй чунни, куьнни зенгерин “харцик” акатнава. Алава и пул 3 йис июлдин, августдин ва сентябрдин варцара тамам хьанвай ва я жезвай аялрин диде-бубайривай къачуз жезва. И яшда авай, яни хайи йикъалай 3 йисалди яшда авай аялриз алай йисан июндин ва июлдин варцара 5 агъзур манат гайиди я. А вахтунда абур 10 агъзур манатдин кьадарда аваз гайи пулуник акатнач. ГьикI лагьайтIа, и пул гуник акатзавай аялар 3 йисалай 16 йисал къведалди яшда авайбур хьун лазим тир. Гила а программада са тIимил дегишвал хьанва, яни гатун кьве вацра ва сентябрдиз чпин 3 йис тамам жезвай аяларни кухтун хъувунва. А чIавуз таганвай пулар “августдинбур” яз хгуда. ИкI, 10 агъзур манатдин кьадарда аваз пул къачун патал аял хайи вацран сад лагьай йикъалай арза гуз жеда, амма 30-сентябрдилай геж тушиз, — алава хъувуна П.Абдурагьмановади.
Мадни хъсандиз гъавурда гьатун патал тикрар хъийин, алава 10 агъзур манат, 3 йисалай 16 йисалди яшда авай аялриз пулар гудайла, а чIавуз 3 йис тамам тахьанвай, яни 3 йис июлдиз, августдиз тамам хьанвай ва я сентябрдиз тамам жезвай аялриз гузва. Амайбур акатзавач.
«Лезги газет»
