2025-йисан нетижайралди, Дагъустанда­ гьасилзавай некIедин кьадар 1 миллион­ тонндив агакьнава – им СКФО-дин мулкунал гьасилзавай некIедин санлай къачур  кьадардин  пудай са пай я. ГьакIни респуб­ликадал округда гьасилзавай якIун ва какайрин кьудай са пай гьалтзава. РД-дин хуьруьн майишатдин ва недай суьрсетдин министерстводи хабар гузвайвал, алатай йи­суз Дагъустандин хуьруьн майишатдин хилен зегьметчийри гьасилзавай некIедин кьадар  тахминан 977 агъзур тонндив агакьарнай. Им Кеферпатан Кавказдин федеральный округдин субъектрин арада виридалайни  виниз тир агалкьун я – санлай къачурла, округда 3,1 миллион тонн нек гьасилнава.

2025-йисуз Дагъустан Республикади­, санлай къачурла, 276 агъзур тонн як ва тахминан 255 миллион кака гьасилна. СКФО-дин мулкунал  — 1,1 миллион тонн як ва 1,7 миллиард кака.

ГьакIни, малум хьайивал, 2025-йисан нетижайралди, Дагъустандин малдарви­лин­ хилени агалкьунар хьанва. Госу­дар­ст­­водин статистикадин федеральный­ къуллугъдин Дагъустанда авай органдин делилрал асаслу яз, республикадин вири­ жуь­ре майишатра авай ири карч алай гьай­ванрин кьадар, санлай къачурла,  914,3 агъзурдав агакьнава. Им алатай йисандалай 2 процентдин гзаф я. Къейдзавайвал, ири карч алай гьайванрин чIехи пай – 714,4 агъзур мал – агьалийрин хсуси ма­йишатрал гьалтзава. Лежбервилинни фермервилин майишатра 124 агъзур гьайван ава, хуьруьн майишатдин  тешкилатра – тахминан 76 агъзур.

Республикадин лапагрин суьруь 4,67 миллион гьайвандикай ибарат я. Гьа са вахтунда, абурун са  пай (тахминан 2,36 миллион) фермервилин майишатрал гьалт­зава, мад 1,23 миллион — хуьруьн ма­йишатдин тешкилатрал, са миллиондив агакьна лапагар агьалийрин хсуси майишатра ава.

Къушчивилин хелни виле акьадайвал чIехи хьанва: 2024-йисан кьадардив гекъигайла, шаз республикадин мулкунал кIвалин къушарин кьадар  7,1 процентдин гзаф ва 4,83 миллиондиз барабар хьанва.

Амина Муслимова