Газ ишлемишунай къимет (пул) вахт-вахтунда гана кIанда. Гьа ихьтин лишандик кваз и мукьвара “Газпром межрегионгаз Пятигорск” ООО-дин Дагъустанда авай филиалдин Дербент ше­гьердин ва райондин отделдин начальник Агъабег Агъабегов чкадин ва республикадин “Ватан” ва  “Дербент” газетринни телевиденидин журналистрихъ галаз гуьруьшмиш хьана.

Гуьруьшдин вахтунда регионгаздин векилди карханадин кIвалахдикай, алукьнавай хъуьтIуьн варцара агьалияр ва тешкилатар газдалди ара датIана таъминаруниз ам  гьикI гьазур хьанватIа, гьадакай гегьеншдиз суьгьбетна.

Четинвилерикай лап чIехиди ва кар алайди агьалийри ва тешкилатри­ иш­­лемишзавай газдин гьакъи вахт-вах­тунда тагун я. И къайгъусузвал ва­ ни­зам­суз­вал  себеб  яз неинки  са  Дербент шегьерда, гьакI вири Кьиблепатан ­Да­­гъустан­да­ни регионгаздиз чIехи ­буржар арадал атанва. Газдин гьакъи четинвилер авачиз гун патал вири шар­тIар яратмишнава: шегьерра ва хуь­ре­рин чкайра махсус кассаяр кардик ква, почтарин вири  отделенийрани агьа­лийривай  и  карханадин векилри пул кьабулзава. И кар генани кьезиларунин мураддалди агьалийриз чкадал, яни чпин кIвалерани, кассовой махсус апаратар гвай контролерри къуллугъзава ва  кьабулай  пулдин  квитанциярни  ­гузва.

— Гьелбетда, — къейдна А.Агъабегова, — чавай низамсуз абонентрин барадай серенжемарни кьабулиз жеда. Дагъустандин гьукуматдин къарардал бинеламиш хьана, кьве вацралай гзаф вахтунда ишлемишнавай газдин гьакъи таганвай абонентдин кIвалихъай газ атIу­дай ихтияр ава. Амма чна чи  патай, иллаки хъуьтIуьн вахтунда, и серенжем кьабулзавач — агьалияр газ авачиз тазвач. Чна ийизвай гьуьрметдин гъавурда акьунни лазим я эхир.

Генани са татугайвал — гьам шегьерра ва гьамни хуьрерин чкайра бязи        ксари, чаз хабар тагана ва ихтияр авачиз, газ атIузва, турбаяр дегишарзава, цIийи кIвалериз ва хсуси къазанханайриз газ тухузва, агьалийрин наразивал, гьакIни   хаталувал арадал гъизва.

ТIвал кьве патални кIвенкIв алайди я лугьудайвал, регионгаздин кIвалах­да­ни кимивилер, татугайвилер, абонентрин па­тай гьахълу шикаятар, наразивилер ара­дал гъизвай дуьшуьшарни кими туш. Бя­зи вахтара, иллаки вацран эхирра, агьали­­яр хабардар тавуна, 4-5 юкъуз газ атIуз­ва, гьатта вахт-вахтунда ишлемишнавай газдин пул гузвай агьалийрални буржар илитIзава. Чеб гьахъ тирди субу­та­рун па­тал инсанар суд-дуванра  гьат­зава.

— Чун ахьтин къачагъвилериз рехъ гузвай контролеррикай азад хьанва, кьетIи серенжемар кьабулнава — инанмишарна Регионгаздин векилди.

Нариман Къарибов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя