Махачкъалада Дагъларин уьлкведин къадим хуьрериз талукь шикилрин выставка кьиле фена.

Этнографиядин “Дагестанский аул” комплексди Милли библиотекадихъ, Дагъустандин культурадин ирс хуьнин агентстводихъ ва РАН-дин ДНЦ-дин ЧIалан, литературадин ва искусстводин институтдихъ галаз санал тешкилай и выставкада тамашачийриз 60-далай гзаф шикилрихъ галаз таниш жедай мум­кинвал авай. Къадим Ахцегьринни Гунибдин, гадарнавай Гъуьгъвезринни Гамсутлдин ва гзаф маса хуьрерин шикилар рангунинбур тушиз хьун дуьшуьшдин кар я лугьуз жедач. Выставкадин кьилин макьсад, ам ачухдайла тешкилатчийри къейдайвал, хуьруьн чкада, михьи гьавадал ва гуьзел тIебиат­дин юкьва уьмуьр куьчуьрмишунал, чи багъри ерияр-хайи хуьрер виликди тухунал жегьилар желбун я. “Къадим хуьрер — ри­кIелай физвай культура” ихьтин лишандик кваз выставкада чан аламай ва гадарнавай хуьрер са жергеда аваз къалурунни тамашачийрив фикириз тунин лишан я. Гадарнавай хуьрер къе анжах лацу ва чIулав рангаралди къалуриз жеда — чубарукрин му­кар хьиз, дагъдин кукIвал ва я рагъ гьатзавай пата, чархарал эцигнавай къванцин цлар. А кIва­ле­рай къавун еринда къе цав аквазва, амайди ­анжах кьуру цлар я. Фикир та­гайтIа, чи амай хуьрерни гьахьтин­ гьалдиз къведа.

Выставка ачухунин паюна, тамашачийрихъ элкъвена, чи къадим хуьрериз, анра авай ирсиниз талукь рахунар “Дагестанский аул” этнокомплексдин директордин заместитель Татьяна Петенинади, Да­гъус­тандин культурадин ирс хуьнин агентстводин регьбердин везифаяр вахтуналди тамамарзавай Заур Къагьриманова ва масабуру авуна.

— Чи республика надир чка я. Россияда культурадин ирс яз гьисабзавай чкаяр виридалайни гзаф авай вад субъектдин жергедик Да­гъустанни акатзава. Чи регионда ахьтин 6,5 агъзур объект ава. Абурукай кьве агъзур федеральный де­режадинбур я. Президентдин тек­­лифдалди вири объектар сад тир инфореестрдик кутунва. Чи куль­турадин ирс хуьн патал вири къуватар серфна кIанда, — къейдна З.Къагьриманова.

Дагъви Шериф

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя