* * *

Кьуд вишелай гзаф хизанар авай

Кьуьчхуьррин хуьр, вучиз ажуз хьана вун?

Акьван мублагь мулкар-майданар авай,

Жуьрэтсуздаз, де лагь, гьикI элкъвена вун?

 

ЧIехи ашукь Саид туна гьакI текдиз,

Гъейратлуди гъейратсузрив вугана?

Хьанач фелек фидай адан куьмекдиз,

Вагьши къанлу туна, жаза тагана.

 

Хандин чина жида хьайи Саид бес

Етим тирни, кьулухъ арха галачиз?

Гьавиляй тушни, кьурана билбилдин сес,

Амайди чун къени садвал авачиз?

 

Сад хьайитIа чи мазлум дагъви эллер­,

Амукьдай хьи чи кьегьалдин нур — вилер­.

Акъуддайни жаллатIди а чиркин фенд?

Гьич герекни жедачир жед тур — тфенг…

Омар Гьуьсейнов