И йикъара Санкт-Петербургдин “Конгрессрин дворец” комплексда Россиядин Гьуьлерин дяведин флотдин образованидин идараяр акьалтIарнавай лап хъсан 77 жегьил офицердиз рикIел аламукьдай “Константиновский знак” гуниз талукьарнавай шадвилин мярекат кьиле фена.
Россиядин флотдин бине кутурди пачагь I Петр я. Флот мадни къудратлу хьуник чпин пай кутур пачагьар, полководецар, адмиралар гзаф хьана. Абурун арада вичин вири уьмуьр ВМФ-диз бахш авур чIехи князь, генерал-адмирал Константин Николаевич Романовни авай. Адан баркаллу крар фикирда кьуна, 2004-йисуз Россиядин Федерациядин Президентдин крар идара ийидай Управлениди ва оборонадин министерстводи кьил кутуналди, Россиядин офицеррин итиж хкажунин, жегьилар ватанпересвилин руьгьдаллаз тербияламишунин мураддалди жегьил офицерар шад гьалара агъмишдай мярекат тешкилна. Алатай 13 йисуз “Константиновский знак” уьлкведин ВМФ-дин образованидин идараяр куьтягьай агъзурдалай виниз офицерриз гана.
Шад жедай кар ам я хьи, цIинин мярекатдал лап хъсанбурун жергеда аваз П.Нахимован тIварунихъ галай, Яру Гъетрен орден авай ЧIулав гьуьлуьн военно-морской кьилин училище куьтягьай жегьил лейтенант Рустам Рустамовазни “Константиновский знак” гана.
Рустам Рустамов Мегьарамдхуьруьн райондин Хуьрелрин хуьряй я. Россиядин Федерациядин Яракьлу Къуватрин офицер жедай мурад адахъ гъвечIи чIавалай авай. Школадилай гуьгъуьниз военный вуздик экечIдай мумкинвал тахьай гада кIвалахдив эгечIна. Са тIимил вахтундилай ам армиядин жергейриз фена. Сахалиндин областдиз акъатай Р.Рустамова пияда кьушунра къуллугъна. Ада гимийрин капитанрикай, матросрикай, ватанэгьли Михаил Лезгинцеван адмирал рухвайрикай ктабар кIелна, адан рикIе гимийрин капитан хьунин мурад гьатна.
Мурадди вилик ялзавай гада армиядилай гуьгъуьниз Тихоокеанский военно-морской кьилин училищедик экечIна. Пуд лагьай курс куьтягьайла, лап хъсандиз кIелзавай жегьил Севастополда авай ЧIулав гьуьлуьн Яру Гъетрен орден авай кьилин училищедиз рекье туна. Лезги кьегьалди инани вич бажарагълу, тапшурмишай кар уьтквемвилелди, намуслувилелди кьилиз акъуддай кас яз къалурна. КIелунани, къуллугъдани, спортдани, общественный уьмуьрдани сифте жергейра авай курсант Р.Рустамова виридан патай гьуьрмет къазанмишнавай.
Вичин везифайрив истемишдай къайдада эгечIзавай курсант гъвечIи командирвиле тайинарна. Вузда ада гьакъисагъвилелди взводдин командирдин заместителдин везифаяр тамамарна. Адан къуллугъдин характеристикада кхьенва: “Вичел тапшурмишай гьар са кардив Р.Рустамов жавабдарвилелди эгечIзава. Ам савадлувилелди, мукьуфвилелди, алакьунралди, вичин гьар йикъан крар тешкиллувилелди кьилиз акъудуналди амайбурулай тафаватлу я. Вичихъ галаз къуллугъзавай ва кIелзавайбурухъ галаз хуш рафтарвал хуьзва. Адахъ уьтквемвал, жуьрэтлувал, кIелунрин рекьяй агалкьунар ава. ДатIана вичин чирвилер, вердишвилер, пешекарвал хкажун патал алахъзава”.
Рустам Рустамова вичиз кIелдай, виликди фидай мумкинвал, четин вахтара герек куьмекар гунай вичин буба Эйзединаз, диде Сейранатаз, хуьруьн школадин директор Гьаживагьаб Абдулвагьабоваз, муаллимар Диляра Рамазановадиз, Гьабиб Гьажиеваз, училищедин муаллимар Евгений Ильиназ ва Юрий Остапенкодиз рикIин сидкьидай сагърай лугьузва.
Жегьил офицеррив дипломар, цуьквер ва знак вахкузвай мярекатда Россиядин ВМФ-дин Главнокомандующий, адмирал Владимир Королева, РагъакIидай патан военный округдин кьушунрин командующий, генерал-полковник Андрей Картаполова, Санкт-Петербургдин вице-губернатор Александр Говорунова, ВМФ-дин ветеранри, общественностдин векилри ва маса мугьманри иштиракна. Р.Рустамовав “Константиновский знак” генерал-полковник Андрей Картополова вахкана ва адаз офицервилин, Ватандиз къуллугъ авунин карда агалкьунар хьана кIанзавайди лагьана.
Низамидин Къайинбегов
