Къалажухви шаир, журналист Азедин Мимерзаев фадлай “Лезги газетдихъ” галаз алакъаяр хуьзвай авторрикай сад я. Эхиримжи вахтара макъалаяр, очеркар кхьизмачтIани, ам мукьвал-мукьвал редакциядиз мугьман жезва, газетдикай вичин фикирар лугьузва, меслятар къалурзава.
2010-йисуз А.Мимерзаеван къелемдикай “Уьмуьрдин гелер” тIвар алай ктаб хкатна. Махачкъалада “Дагъустандин халкьар” издательствода чапдай акъатнавай и ктабдин тираж 600 экземпляр я. Ана авторди кхьенвай шиирар, уьлкведин, Дагъустандин, Лезгистандин тарихда кьетIен гел тунвай рухвайриз бахшнавай очеркар, макъалаяр, жуьреба-жуьре шикилар гьатнава.
Мукьвара ада газетдин редакциядив вичин шиирар агакьарна. Къе чна абурукай бязибур кIелзавайбуруз теклифзава ва автордихъ кIубанвални яргъи уьмуьр хьун алхишзава.
Кьуьзуьвал
Рехи хьанва кьилин чIарар,
Сиве амач жуван сарар,
Вун я ахьтин мердимазар,
Зи виликай квахь, кьуьзуьвал.
Гьисаба амукьдач ви гафар,
РикIелай физ авур крар,
Хьана лугьуз вахъ са гьунар,
Зи виликай квахь, кьуьзуьвал.
Вилерин экв хьанва зайиф,
Фей уьмуьрдин чIугваз гьайиф,
Къе кхьизва за ваз тесниф,
Зи виликай квахь, кьуьзуьвал.
Чанда амач кIусни такьат,
Квахьнава зи вири къуват,
ЧIугваз тамир зав хажалат,
Зи виликай квахь, кьуьзуьвал.
Хцини вун ида русвагь,
Кутада вак агъзур гунагь,
Ваз хъжедач маса панагь,
Зи виликай квахь, кьуьзуьвал.
Хъуьруьнарда ви гафарал,
Гьам кимелни, гьар чкадал,
Жегьилвал тир рикIин хиял,
Зи виликай квахь, кьуьзуьвал.
Яшлубуруз амач гьуьрмет,
Квадарнава ахьтин адет,
Вак ква лугьуз чIуру хесет.
Зи виликай квахь, кьуьзуьвал.
Вуна вуч авурди я луз,
Хизанри вун тада ялгъуз,
Хабарсуз эхирни са къуз
Вун заз къалум жед, кьуьзуьвал.
Зи хайи хуьр
Тик дагъларин юкьни-юкьвал
ЭкIя хьанва вун хунча хьиз.
Авадан ви гьар са кIвал,
Ватан патал рухваяр хуьз.
Заз хуш я ви рагар, къванер,
Экуьн дагъдин рагъул ценер.
Заз багьа я гьар са жигъир,
Вакай я зи даим фикир.
АвачтIани гьяркьуь рекьер,
Къуьлер цадай ачух чуьллер,
РикIиз хуш я Ягъун пелер,
ЭкъечIзавай мулдин цуьквер.
Берекатдин чанах я вун,
Чи виридан дамах я вун,
Хуш къилихрин ксар авай
Дигай, мублагь яйлах я вун.
Гьар са кIвалах вилик тухуз
Жегьил чанар кIвенкIве ава.
Зазни хуш я вакай лугьуз,
Дереда ваз гьуьрмет ава.
Дегиш хьанва хуьруьнкъамат,
Мурад — дуьнья хьун саламат.
Ислягьвилин аваз рекье,
Абад хьурай чIехи уьлкве.
Ви кьуд падни яйлахар я,
Дагъдин къайи булахар я.
Цуьквер атир кьилел алаз
Къалажух, вун багьа я чаз.
Шадлухрин столдихъ
Гьар жуьредин наз-няметар
Куь столдал алаз хьурай.
Жуваз кIани, жувни кIани
Ярар-дустар галаз хьурай.
Мукьвал-мукьвал ихьтин стол
Заз куь вилик акваз хьурай.
Чина аваз шадвилин хъвер,
Хуш суьгьбетар рахаз хьурай.
Кьилел алаз ракъинин нур,
Ачух цав квез акваз хьурай.
ГъвечIи-чIехи, шад хтулар
Куь къваларив къугъваз хьурай.
Гьар гьафтеда хуьруьн кимел
Зуьрнедин ван алаз хьурай.
Рахадайла гьардан мецел,
Ширин гафар алаз хьурай.
Куь кIвалериз къведай хабар
Анжах шадлух теклифар хьуй.
Къалажухда мукьвал-мукьвал
Мел-мехъерар, межлисар хьуй.
Зи кфил
Зи кфилдин сесини
Куь гуьгьуьлар шадарда,
РикIе авай дердияр
Вири санлай квадарда.
Яйлахдавай чубанри,
Кфил ягъиз, изва кьуьлер.
Ашкъидивди зегьмет чIугваз,
Гумрагьдаказ хуьзва хипер.
Гьар гьина зун хьайитIани,
Ам захъ галай юлдаш я.
Патал хуьруьз фейитIани,
Тереф хуьдай къардаш я.
Чуьлда хьайи йикъара за
Кьилик кутаз ксана.
Хабар хьайи гьар са чIавуз
Адахъ галаз рахана.
Текдиз чуьлда хьайила,
Ам хъуьчIуьк квай даях я.
Хиялри кьур вахтара
Гуьгьуьл шаддай панагь я.
Чуьллера зун гзаф хьана,
Гъам-хажалат алудиз.
РикIе аваз агъзур хиял,
Яргъи йифер акъудиз.
Эмирбеган кемендин хьиз,
Зи кфилдин сес я ширин.
Гьар жуьредин макьам ягъиз,
Пишкеш цуьквер кIватIиз якъин.
Мукьвал-мукьвал шадмежлисрал
Кфилдин ван алаз хьурай.
Ялгъуз гьар са декьикьада
Ам даим чахъ галаз хьурай!
Азедин Мимерзаев
