* * *
Пуд патахъди шегьре рекьер,
Кьуд пад къацу багълар-чуьллер.
Мадни гуьзел яргъи уьмуьр
Гурай ваз, зи Советский хуьр.

Халкьдиз герек дараматар,
Хуьруьн кьилихъ бул базарар,
Шегьердиз къе хьанва ухшар,
Аллагьди хуьй Советский хуьр.

Яшамиш жез ирид миллет,
Арадаваз чпин гьуьрмет,
И хуьр квез авур кьисмет,
Къени касдиз гурай женнет.

* * *

Вун алахъмир заз тIар ийиз,
Зун акурла рахан тийиз,
Амукьда вун жагъин тийиз,
Гьахьдай рехъ зи тIарай рикIиз.

Къад суз тIуьна вахъ галаз фу,
ТIуьрдакай къе ийиз агъу.
Алахъна вун ийиз тармар,
Зи зегьметдин дараматар.

За хайибур закай яргъаз,
Абрун сиве чIуру мез тваз.
Гьар гафунин жез вун чIалахъ,
Зиди таб я — дустар ви гьахъ.

Са вахт къведа, жеда ваз чир,
Квачирди зак гьич са тахсир.
Гьелбет, ахпа жеда лап геж,
Амукьда вун рикIи-рикI нез.

«Лезги  газетдин» 2025-йисан 48-нумра