Ламни шакIва*
Дагъдин хуьре са авамдал
Лам лугьудай лакIаб алай.
Вичелайни адан папаз
Ам кар хьанвай азаб алай.
Са къуз дустар къунагъарна,
Авуна куьк гьерни кьасаб.
Авамдив гвай са тIалабун:
Алуд лугьуз вичин лакIаб.
ТIуьна-хъвана хъфидайла,
Са лутуди, гатаз руфун,
Меслят гъана гьа йикъалай
Адаз «лам» ваъ, «шакIва» лугьун.
Вирида, са гафуналди,
Хвена меслят гъайидан пад.
Авам вични авай хъуьрез:
Амачир кьван хьанвай ам шад.
Къунагъар фад акъадарна,
Хабар гана папаз хвешиз,
Лугьудайди къенин къалай
«Лам» ваъ, «шакIва» лакIаб вичиз.
— Я авам, вун шадзава квел,
Чал жемятар хъуьредачни?
«ШакIвадикай» са йисалай
Виликан «лам» хъжедачни?
_______________
* ШакIва — шаркIунтI.
«Лезги газетдин» 2025-йисан 46-нумрадай
____________________________
Демократия критикдин вилералди
ГъвечIи сегьне
Иштиракзавайбур:
Банкир — Мегьамед Асланович.
Клиент — набут инсан.
Банкирдин дуст — Алибег, карчи.
Банкирдин секретарша — Гуьзел.
Агьвалат банкирдин кабинетда кьиле физва.
Банкир. Уф… аман…
Пелел гъил эцигна, истикандиз яд цазва ва къанихдаказ хъвазва
Уф… аман…
Кабинетдиз алкIай юбка алай секретарша гьахьзава.
Секретарша. Мегьамед Асланович! РакIарихъ клиент атана акъвазнава. ТIалабзава кьабулун.
Банкир. Авач лагь! Вахт авач лагь!
Секретарша. Адаз чизва е… за гьикI лугьуда е?..
Банкир. Де хорошо, атурай. Уф, гьакIани тIазвай кьил…
Клиент къведа.
Клиент. Саламалейкум, чIехиди!
Банкир (Саламни кьун тавуна). Вуч кIанзава? Эквни тахьанмаз атана.
Клиент. ЧIехиди, заз, хьанайтIа, кредит къачуз кIанзавай…
Банкир. Авач кредит, гузмач, акъвазарнава.
Клиент. Я чIехиди! Бес накь зи къунши Усманаз гана хьи…
Банкир. Накь авай. Къе акъвазарнава.
Клиент. АкI ятIа, за фена герек чкадиз арза ийида.
Банкир (Хъел атана). Жегьеннемдиз вач! Квахь садра кабинетдай!
Клиент кабинетдай, мурмурар ийиз, экъечIда.
Агь, ламран хва лам… ГьакIани тIазвай кьил… (Рычал-су путулкадай хъвада.) Уф.. аман…
Кабинетдиз Алибег гьахьда.
Алибег. Салам, зи дуст!
Банкир. Салам, азизди!
Гарданар кьада. На лугьуди, ибур яргъалди сад-садаз акунвачир.
Алибег (Столдал алай «Рычал-су» циз килигна). В пьянстве замечен не был, но по утрам жадно пьет холодную воду…
Банкир. Агь, зарафатчи… Вуч хабарар ава?
Алибег. Вири гьазур я. Гуьзетзава.
Банкир. КицIиз-кациз таквадай чка хьурай.
Алибег. На лоне природы, подальше от людских глаз…
Банкир. Поляна ни ачухзава?
Алибег. Вири къе Агьмеда вичел къачунва.
Банкир. АкI ятIа, машин види хьурай.
Алибег. О-кэй, босс.
Банкир. Гуьзел, я руш! Инал ша!
Кабинетдиз секретарша гьахьда.
Секретарша. Гьай, шеф. Зун куь къуллугъда акъвазнава.
Алибег дикъетдалди Гуьзелаз килигзава. Банкирди Алибегаз тIуб юзурзава.
Банкир. Красавица! Хабар кьадай ксариз зун командировкадиз фенва лагь, Дербентдиз… ваъ, Махачкъаладиз.
Секретарша. Эгер агъабуру хабар кьуртIа?
Банкир. Я руш, гьикьван чирда? Райкомдай хабар кьуртIа, исполкомда ава лагь. Исполкомдиз герек хьайитIа, — райкомда.
Алибег. Юзан, зи дуст, геж жезва.
Банкир. Эхь-эхь, геж жезва. Гуьзел, вун гъавурда акьуна…
Дустар, гарданар кьуна, кабинетдай экъечIда. Пердедин кьулухъай сес: «Гьа икI гьар юкъуз».
«Лезги газетдин» 2026-йисан 9-нумрадай
