Вичин бине гилан СтIал Сулейманан райондин Курхуьряй яз гьисабзавай и шаир лезгийрин чилел къецепатан чапхунчийрихъ галаз женгер физвай татугай девирда яшамиш хьана. Ам вични женгчийрин кьиле акъвазна, зулумрикни акатна.
Куьре Меликан са шумуд шиир, абурукай яз «Гьамиша хьухь викIегь, кьегьал», «Къул хуьз экъечI!», «Вун бахтунин рекье хьухь», «Ярдин дидар» 1980-йисара, М. Ярагьмедованни Абдул Фетягьан алахъунар себеб яз, кIелзавайбурув агакьна. КIалубрал гьалтайла къешенг, манадиз дерин Меликан шииррикай хейлинбур ватанпересвилин темадай я. Мадни адахъ муьгьуьббатдин, насигьатдин, дуьньядин гьалар веревирд ийизвай эсерар ава. Шаирдин яратмишунра лезги, фарс ва араб чIаларал теснифнавай «Мусибат-наме» тIвар алай чIехи эсерди важиблу чка кьазва.
«Лезги газетдин» 2025-йисан 6-нумрадай
