Гатун марф

ДакIардал кIвалин ацукьайла зун,

Марфади гатун чилер гатазвай.

Са къатда ятар чи чIутхваррай физ,

Шур-шурдин ванциз зи рикI ахъазвай.

 

Цав цифери кьунва, къалиндиз михьиз,

КIанзавайди хьиз и алем чуьхуьз.

Гагь гугрум ийиз, гагь цIай чукIуриз,

Шерик жезва цавни, чилни заз сад хьиз…

 

Диде

Азиз диде, масан диде!

Зи гьиссера рахазва вун.

Ви ширин сес аваз рикIе,

ЧIалар кхьиз, алгъизва зун.

 

ВиртIедилай ширин я мез,

КичIе я заз вун назар жез.

Ви гаф, ви суй жеда вине,

Мержанрилай багьа диде.

 

Дидедин гаф аваз рикIе,

Шиир кхьиз гьазур я къе.

Вун сагъ хьурай, азиз диде,

Гьакьван хуш тир рикIиз.

«Лезги газетдин» 2018-йисан 35-нумрадай