Зи кфил
Зи кфилдин сесини
Куь гуьгьуьлар шадарда,
РикIе авай дердияр
Вири санлай квадарда.
Яйлахдавай чубанари
Кфил ягъиз, изва кьуьлер.
Ашкъидивди зегьмет чIугваз,
Гумрагьдаказ хуьзва хипер.
Гьар гьина зун хьайитIани,
Ам захъ галай юлдаш я.
Патал хуьруьз фейитIани,
Тереф хуьдай къардаш я.
Чуьлда хьайи йикъара за
Кьилик кутаз ксана,
Хабар хьайи гьар са чIавуз
Адахъ галаз рахана.
Текдиз чуьлда хьайила,
ХъуьчIуьк квай даях я.
Хиялри кьур вахтара
Гъам алуддай панагь я.
Чуьллера зун гзаф хьана,
Гъам-хажалат алудиз.
Сиве аваз цIийи кфил,
Яргъи йикъар акъудиз.
Эмирбеган кеменча хьиз,
Зи кфилдин сес я ширин.
Гьар жуьредин макьам ягъиз,
Пишкеш цуьквер кIватIиз якъин.
Мукьвал-мукьвал шад межлисра
Кфилдин ван аваз хьурай.
Хайи йикъаз талукьнавай
Мярекатдин хан яз хьурай.
«Лезги газетдин» 2020-йисан 25-нумрадай
