Ахцегьа акъажунар

Мукьвара футболдин “Ахцагь” клубдин стадиондал 2000-2001-йисара дидедиз хьанвай жаванрин арада мини-футболдай “Спорт наркотикризни терроризмдиз акси я!”, “Ахцегьрин жегьилар сагълам уьмуьрдин терефдарар я” лишанрик кваз акъажунар кьиле фена.
Къугъунар башламишдалди вилик Ахцегь райондин администрациядин футболдин клубдин, спортдин, жегьилрин ва туризмдин отделдин кар алай пешекар Н.Исмаиловади, акъажунрин кьилин судья А.Жалилова ва судья А.Мирзоева жегьилрихъ элкъвена руьгь кутадай келимаяр лагьана ва ихьтин мярекатра жезмай кьван гзаф командайри иштиракуниз эверна.
1-чка кьур Луткунрин, 2-чкадиз лайихлу хьайи Ахцегьрин, 3-чка кьур Хуьруьгрин жегьилрин командайриз медалар, кубокар ва грамотаяр гана.