И йикъара чи милли медениятдин ва печатдин хилен работникрив чIехи магьрумвал агакьна: яргъалди чIугур залан азардикди чи къелемдин чIехи вах, бажарагълу публицист, таржумачи, методист ва Дагучпедгиздин редактор хьайи СССР-дин печатдин отличник Гъаниева Магьият Багьаудиновна рагьметдиз фена.
М.Б.Гъаниева 1931-йисуз Ахцегьа дидедиз хьана. Ана юкьван школа, Махачкъалада Дагъустандин дишегьлийрин пединститутдин филфак акьалтIарна, ада хайи хуьре муаллимвиле кIвалахна.
1959-йисалай 1987-йисалди, саки 35 йисуз, ада Дагъустандин учебно-педагогический издательствода лезги чIалал акъатзавай литературадин (ктабрин) редакторвална. Адан гъиликай цIудралди учебникар, хрестоматияр, методикадин пособияр, аялар патал кхьенвай художественный эсеррин ктабар хкатна. Хейлин ктабар туькIуьрайдини ам вич я. Магьият Багьаудиновнади лезги чIалаз маса чIаларай хейлин художественный эсерар лап вини дережада таржума авуна.
Адан зегьмет “СССР-дин печатдин отличник” тIвар, гьуьрметдин грамотаяр, “Зегьметдин ветеран” медаль гуналди къейдна.
Чна рагьметлудан хизандиз, мукьва-кьилийриз, багърийриз башсагълугъвал гузва. Магьият Багьаудиновна Гъаниевадин экуь къамат чи рикIелай садрани алатдач.
«Лезги газет»
