Дагъустандин искусстводин хилен векилри и йикъара агакьай туькьуьл хабардикди яс чIугвазва. 82 йисан яшда аваз лап хъсан инсан, тIвар-ван авай художник, гьуьрметлу буба Имамали Халилович Халилов рагьметдиз фена.
Ам 1937-йисуз Ахцегь райондин Ялахърин хуьре кIвалер, дараматар нехишламишунин рекьяй машгьур устадрин тухумда дидедиз хьана.
Ада хуьруьн школа, Дербентдин педучилище (1957-йис), гуьгъуьнлайни Махачкъаладин художественный училище (1965-йис) акьалтIарна.
Вичин агалкьунар ада графикада ва суьретар чIугуна къалуриз хьана. Хейлин шикилар дагъларин тIебиатдиз, Дагъустандин тарихдиз, иллаки 1999-йисан августдинни-сентябрдин вакъиайриз талукьарна.
И.Халилован шикилрин выставкаяр Махачкъаладилай гъейри, Бакуда, Горькийда, Ленинградда, Москвада, Нальчикда, Ставрополда, Туьркиядин Измир шегьерда, масанрани кьиле фена. Адан руьгь тухардай ажайиб рангаринни къашарин шикилар хейлин ксарин кIвалера, чи культурадин идарайра, мектебра, колледжра, масанрани хуьзва.
Имамали Халилович РФ-дин художникрин Союздин член, РД-дин искусствойрин лайихлу деятель тир.
Чна рагьметлудан хизандиз, мукьва-кьилийриз, багърийриз, вири ялахъвийриз башсагълугъвал гузва. Имамали Халиловичан экуь къамат чи рикIелай садрани алатдач.
«Лезги газет»
