Алатай киш юкъуз РД-дин хуьруьн майишатдин ва недай суьрсетдин министрдин везифаяр вахтуналди тамамарзавай Шамил Алиев Ахцегь райондиз фена. Министерстводин набататчивал ва багъманчивал виликди тухунин отделдин начальник Агьмед Расуловахъ ва РД-дин “Дагсельхозстрой” ГКУ-дин директор Мегьамед Юсуповахъ галаз санал ам муниципалитетдин хуьруьн майишатдин са жерге объектрихъ галаз таниш хьана.
Сифтени-сифте министерстводин векилри Ахцегьрин хуьре хизандин малдарвилин ферма арадал гъун ва гегьеншарун патал грант къачур карчи Роза Гьажиевадин майишатдал кьил чIугуна. Ина некIедин лаборатория ва ниси хкуддай кархана кардик ква, фермади гьасилзавай суьрсет гьам райондин, гьамни республикадин агьалийрин арада машгьур я.
Шамил Алиева райондин администрациядиз алай вахтунда еке машгьурвал авай экотуризмдин хилез фикир гун теклифна. Ада къейд авурвал, туризмдин ихьтин къайдаяр виликди тухунин жигьетдай райондихъ еке мумкинвилер ава.
“Ахцегьрин машгьур гьамамар патав гва, гуьзел тIебиат ва кьакьан дагълар ава. Вири ибуру гьатта чкадин туристар желб авун мумкин я, гьикI лагьайтIа, хуьруьн чкада яшамиш жедай мумкинвал виридахъ авач эхир”, — лагьана Ш.Алиева.
Гуьгъуьнлай “Шарвили” СпоК-дик акатзавай теплицадал фена. Ам 2018-йисалай кардик ква. Дагъустандин хуьруьн майишатдин ва недай суьрсетдин министерстводин грантар къачуник умуд кутунвай кооператив 990 кв.метрдин майданда авай теплицайрикай ибарат я ва ина помидорарни афнияр гьасилдай мумкинвал ава.
Луткунрин хуьре авай як гьялдай заводдивай са сменада 45 малдин як гьялиз жезва — адани государстводин патай финансрин куьмек агакьуник умуд кутунва. Ина министерстводин векилар якIун суьрсет гьялунин карда ишлемишдай тадаракрихъ галаз таниш хьана ва, грантрин такьатар ишлемишдайла, гьакIни карханадин кIвалах кьиле тухудайла, законодательстводал амал авунин важиблувиликай рахана. Идалайни гъейри, къейд авурвал, карханадин кIвалах башламишдалди вилик гьасилзавай якIун продукт маса гунин рекьерни жагъурун лазим я.
Мугьманвиле авай вахтунда РД-дин хуьруьн майишатдин ва недай суьрсетдин министестводин делегацияди лезги халкьдин “Шарвили” эпосдин игитдиз бахшнавай шадвилин мярекатрани иштиракна.
Элкъвена хкведай рекье министерстводин делегация Мегьарамдхуьруьн райондин Чепелрин хуьруьн мулкунал алай “Багъ” КФХ-диз мугьман хьана. Са жерге СМИ-ри ина, яргъалди къвайи марфарин ва харцин нетижада майишатдин къенепатан рекьер, ци тухвана, чIур хьанва ва са жерге майишатриз зарар ганва лагьай хабарар раижнай. Ахтармишайла, малум хьайивал, “Багъ” КФХ-ди кIвалах нетижалудаказ давамарзава.
РикIел хкин, идалай са тIимил вилик вичикай рахазвай лежбервилинни фермервилин майишатдиз РД-дин Гьукуматдин Председатель Артем Здунов, хуьруьн майишатдин ва недай суьрсетдин министр Абдулмуслим Абдулмуслимов мугьман хьанай.
Амина Муслимова
