5-июлдиз Ахцегь райондин администрацияда райондин кьил О.Абдулкеримован регьбервилик кваз кьиле фейи совещанидал федеральный программайрин ва региондин проектрин гьакъиндай тухузвай кIвалахар кьиле физвай гьал веревирдна. Идакай «Лезги газетдиз» райадминистрациядин пресс-къуллугъди хабар гузва.

Райондин кьилин заместитель А.Шуаева, образованидин управленидин начальник А.Гьажиева, финансрин управленидин бюджетдин отделдин начальник И.Ибрагьимова райондин кьил О.Абдулкеримоваз «150 школа», «Точки роста» проектар уьмуьрдиз кечирмишунин, мектебра лицензия авай медкабинетар арадал гъунин гьакъиндай кьилиз акъудзавай серенжемрикай хабар гана.

Умуми отделдин начальник Р.Османова чилин участокар инвентаризация авуникай ва ФИАС-дай (Федеральная информационная адресная система) тухузвай кIвалах акьалтIарнавайдакай лагьана.

Совещанидин вахтунда хуьруьн майишат вилик тухунин, налогар кIватIунин месэлаярни веревирдна. Медениятдин управленидин начальникдин заместитель С.Сулейманова кьиле тухванвай ва фикирдик квай мярекатрикай, «Куьре-2019» международный сад лагьай форумдин нетижайрикай ихтилатна.

Нубатдин совещанидал жуьреба-жуьре маса месэлайризни килигна.       Эхирдай райондин кьили жавабдар ксариз бязи тапшуругъар гана.

«Лезги газет»