Мегьарамдхуьруьн районда хуьрер аваданламишунин кIвалахриз йисалай-суз артух фикир гузва. Михьивални гуьрчегвал хуьнин, хуьрерин къенепатан рекьериз хирхем вегьинин, мулкар къацу авунин рекьяйни гегьенш серенжемар тешкилзава.
«Лезги газетдиз» райондин администрациядин пресс-къуллугъди хабар гузвайвал, хуьрерин мулкар абадунин кIвалахрин сергьятра аваз, и йикъара Ярагъ-Къазмайрин къенепатан рекьериз хирхем вегьена. Хуьруьн кьили къейдзавайвал, куьчеяр тамамвилелди къайдадик кутунин кIвалахар йисан эхирдалди акьатIардайвал я.
И жуьредин кIвалахар Къиличханрин ва Советский хуьрерани кьилиз акъудна. Бес кьадарда чиргъ гъана, куьчейриз вегьена. Махсус техникадин куьмекдалди куьчейриз вегьенвай чиргъ лазим тирвал чкадал ацукьарнава.
Райадминистрациядин къуллугъчидин регьбервилик кваз, Филерин хуьруьн жемятди, хуьруьн депутатри къайдадикай хкатнавай хъвадай цин турба туькIуьр хъувуна. Хъвадай цин турба ремонтунин кIвалах Къуюстанрин хуьрени кьилиз акъудна.
Чешмеди алава хъийизвайвал, жемят патал важиблу ва чарасуз месэлаяр гьялунин, мулкар абадунин кIвалахар давам жезва.
«Лезги газет»
