Са вахтара дишегьлийриз обществода кьиле физвай крара иштиракдай ихтиярар авайди тушир. Гьатта руш хьайила, гада хьайила хьиз хизанда шадвални жедачир. А девирар алатна фена. Алай вахтунда дишегьлияр итимрилай са кIусни гуьгъуьна акъвазнавач. Абурун арадай тIвар-ван авай муаллимар, духтурар, экономистар, илимдин чIехи тIварар къачунвай къуллугъчияр… тIимил акъатнавач.
Къе вичикай суьгьбет физвай Лариса Агъамурадовна Гьажимурадовани гьа ихьтинбурукай сад я. Вичин ери-бине Кьурагь райондин КIутулрин хуьряй тир ам 1986-йисуз Архангельск шегьерда дидедиз хьана (адан бубади гьана кIвалахзавай). Ларисадин аял вахтар Махачкъала шегьерда акъатна. 2003-йисуз меркездин 10-нумрадин школа агалкьунар аваз куьтягьай руш Дагъустандин государстводин халкьдин майишатдин институтдик (ДГИНХ) экечIна. Ларисади вичин чирвилерин дережа хкажуниз ина мадни еке фикир гана. Муаллимрин лекцийрилай гъейри, алава литературадикай менфят къачуз, институт дерин чирвилер аваз акьалтIарна. КIелдай йисара ректордиз векIегь студенткади илимдин сирер чирунихъ ялзавайди чизвай ва адаз аспирантурадик экечIун теклифна. ИкI 2008-йисуз Ларисадикай Дагъустандин государстводин М.М.Жамбулатован тIварунихъ галай аграрный университетдин аспирантка хьана. Ина ада ДГИНХ-дин “Бухгалтерский учет” кафедрадин заведующий, экономикадин илимрин кандидат, доцент Жамиля Исаевадин регьбервилик кваз “Совершенствование механизма диагностики экономического состояния агропромышленных предприятий (на материалах Республики Дагестан)” темадай диссертация кхьиз башламишна. Илимдин кIвалахдин винел зегьмет чIугвазвай вахтунда Лариса Гьажимурадовади вичин темадиз талукь 130 кIвалах чапдай акъудна. Абурукай международный — 85, Вирироссиядин — 27, региондин — 15, гьа жергедай яз 3 макъала РФ-дин ВАК-ди теклифнавай изданийра чапна.
Вахтунда кхьена акьалтIарай диссертация Л.Гьажимурадовади 2018-йисуз ДагГАУ-дин диссертацийрин Советдин заседанидал агалкьунралди хвена. Официальный оппонентар тир экономикадин илимрин доктор, профессор Елена Артемовади, экономикадин илимрин кандидат Эльнара Эминовади ва Советдал рахай маса алимри Лариса Агъамурадовнадин диссертациядихъ практикада еке метлеб авайди, илимдин кIвалахда вилик эцигнавай везифаяр еке устадвилелди кьилиз акъуднавайдакай лагьана.
— КIвалах пешекарвилелди, илимдин ахтармишунивай ийидай истемишунрин дережада аваз тамамарнава: жегьил алимди тайин месэлаяр веревирднава, абур гьялунин рекьер тиклифнава, агропромышленный кархана экономикадин жигьетдай авай гьалдиз къимет гунин цIийи рекьер раижнава, — къейдна абуру.
Диссертациядин Советдин членри рейсадвилелди сесер гуналди, Л.Гьажимурадовадиз экономикадин илимрин кандидатвилин тIвар гунин къарар акъудна.
И мукьвара Москвадай Лариса Гьажимурадовадин диссертация ВАК-ди тестикьарнава ва адаз экономикадин илимрин кандидатвилин тIвар ганва лагьай шад хабар хтана.
Алай вахтунда Лариса Агъамурадовна Дагъустандин государстводин халкьдин майишатдин университетдин “Финансы и кредит” кафедрадин доцент я.
Чна жегьил алимдиз къазанмишнавай агалкьун мубаракзава. Къуй ам мадни еке дережайрив агакьрай!
Надият Велиева
