И йикъара Мегьарамдхуьруьн райондин администрацияда райондин кьилин сад лагьай заместитель Гьабибуллагь Мурадалиеван регьбервилик кваз административный комиссиядин заседание кьиле фена. Идакай «Лезги газетдиз» райондин администрациядин пресс-къуллугъди хабар гузва.
Заседанидин кIвалахда комиссиядин векилри, райадминистрациядин отделрин жавабдар къуллугъчийри ва теклифай ксари иштиракна. Нубатдин заседанидал Чахчах-Къазмайрин ва Мегьарамдхуьруьн агьалийриз талукь яз абуру административный къайдаяр чIурунай туькIуьрнавай 5 материалдиз килигна. Къейдзавайвал, протоколар муниципальный мулкар абадунин ва хуьнин къайдаяр чIурунай, гьакIни общественный чкайра информация раижунин карда къайдайрал амал тавунай туькIуьрнавайбур я.
Материалриз килигайдалай кьулухъ, административный комиссияди жермеяр тайинарунин гьакъиндай къарар кьабулна. Чешмеди алава хъийизвайвал, административный комиссиядин кьилин макьсад тахсиркарриз жаза гун ваъ, райондин сергьятра къайдаяр хуьн ва къанунрал амалзавай гьалариз килигун я.
«Лезги газет»
