—            Гатун чими вахтунда ва я сала, багъда кIвалахна гьекьеди хьанвайла, са тIимил кьел хуькуьрна, уькIуь авунвай яд хъвадай виридалайни хъсан шей я. Нек янавай чай, са тIимил кьел хуькуьрна, хъвайитIа, ада ратар хъсан михьи ийида. Гьавиляй ам тIуьр шейинилай зегьерламиш хьанвайлани ишлемишун меслят къалурзава.

—            КIвалах гзаф авурла, нервияр къайдадикай хкатнавайла, йифиз ахвар тавурла, бязи инсанриз азаб гуда.

Йифиз хъсан ахвар атун патал лимондин­ са пад чкаларни аламаз куьлуь авуна, 1/2 стаканда авай ргазвай яд илична, са шумуд де­кьи­кьа­да тада. Ахпа апельсин­дикай са стакандин кьатIа авай миже хкудна, лимон квай циз яда ва мадни аниз чайдин са тIуруна  авай лацу чехирни  алава хъийида. И дадлу нас­той­ка гьар нянихъ ксудалди вилик 1/2 стакан­да авайди хъвада. Рецепт лап нетижалуди я — гьасятда ахварал фида. И настойкадиз ше­кер вегьейтIа, ам мадни дадлу же­да.

—            Кьулан тарцин грыжа авайла, ксудалди вилик кьулан тар­цин кIарабривай пихтадин ягълу гуьцI­да. Ахпа а чкайрал виртIедик какадарнавай мелгьем (мумиё) эцигда.

—            Кьилин мефтIедин  дамарра ивидин гьерекат йигин хьанвайла хуьрекдин са тIуруна авай чIух­лумпI­­рин чайдик чайдин са тIу­руна авай вирт хуькуьрна, йикъа пуд сеферда хъвада.

—            Бедендал хьанвай жуьреба-жуьре хирериз регъвенвай  кофе кIвахайтIа, хирер фад сагъ хъжеда.­

—            Вилер яру хьана, квал акатнавайла, хуьрекдин 2-3 тIуруна авай мокрица (бязибуру адаз цIар­цIарар, масадбуру келемжар лугьуда) хъчадал са стакан ргазвай яд илична, са сятда тада, ахпа адалди вилер чуьхуьда.

—            Чинал ва я кIвачел мубарак (рожистое воспаление)  акьалтнавайла, хирез зелёнка яда ва къерехрив йод гуьцIда.

Гьазурайди — Надият Велиева