Гуьруьшмиш хьана
Душанбеда Россиядинни Тажикистандин президентри гележегда кьве уьлкве виликди финин алакъайриз талукь месэлаяр веревирдна. Идакай “Новости” РИА-ди хабар гузва.
Чешмеди кхьизвайвал, Тажикистандин президент Эмомали Рахмона къейднавайвал, вини дережада кьиле тухузвай гуьруьшрихъ, суьгьбетрихъ гьукуматрин арада авай алакъаяр гегьеншарунин, хъсанарунин карда чIехи метлеб ава.
Гьукуматрин регьберри Тажикистандин президент алай йисан апрелдиз РФ-диз атуникди арадал атай нетижаяр рази жедайбур яз гьисабна. ГьикI хьи, жуьреба-жуьре хилера санал кIвалахунин гьакъиндай идалай вилик къулар чIугур документра къалурай крар уьмуьрдиз кечирмишзава.
Путин Душанбедиз 15-июндиз ана кьиле фидай саммитда иштиракун патал фенай. Душанбедиз са жерге маса уьлквейрин президентарни атана — Китайдин, Узбекистандин, Къазахстандин, Къиргъистандин, Туьркмениядин, Бангладешдин, Шри-Ланкадин ва Ирандин. Афгъанистандин патай саммитда анин премьер-министрди иштиракна.
Президентдилай рази я
Жемиятдин фикирар чирдай Вирироссиядин центради (ВЦИом) тухвай хабарар кьунин серенжемди къалурайвал, Россиядин Президент В.Путинан кIвалахдиз саки 65 процент агьалийри разивилин къимет гузва.
Ахтармишунри къалурайвал, премьер-министр Д.Медведеваз ва Россиядин гьукуматдиз разивилин къимет гайибурун кьадар 38,3 ва 41,1 процент хьана.
ЛДПР-дин кьиле авай В.Жириновскийдиз — 34,1, КПРФ-дин регьбер Г.Зюгановаз — 33,7, “Адалатлу Россиядин” кьил С.Мироноваз 26,6 процентди ихтибарзава.
Хиве кьуна
США-дин президентдин милли хатасузвилин рекьяй куьмекчи Жон Болтон Россиядини Венесуэлади чпин арада кутIуннавай оборонадин икьрардикай рахана. Ихьтин фикир ада вичин Twitter-да раижна.
Эхиримжи йисара Венесуэлада яшайишдинни экономикадин кризис арадал атана. Сиясатдин кризис 2018-йисан майдиз Николас Мадуро мад сеферда президентвиле хкягъайдалай кьулухъ арадал атанай. 23-январдиз оппозициядин кьил Хуан Гуайдоди вич президентдин везифаяр тамамарзавайди яз малумарнай. Адан тереф США-ди, Канадади, Бразилияди ва бязи маса уьлквейри хвенай.
5-майдиз Гуайдоди Венесуэлада еке дегишвилер тваз кIан хьайи вичин чалишмишвилер нетижасузбур хьайиди хиве кьуна.
Вагьшийрив гекъигна
Латвиядин меркездин мэр Дайнис Турлайса Рига азад хъувурбур рикIел хуьниз талукь гуьмбет чукIуриз кIанзавай агьалийрин фикир критика авуна. Идакай “Новости” РИА-ди хабар гузва.
Ада къейд авурвал, Рига азад хъувур аскерриз эцигнавай чIехи имарат чукIурунин гьерекат ктабриз цIай яна кайи мисалдиз барабар я.
“Чи девирда ахьтин инсанар чилелай квахьнава, ахьтин вагьшияр мад амач лагьана фикирнавай за. Амма, аквазвайвал, тарихдин вакъиаяр тикрар жезва”, — къейдна шегьердин кьили.
14-мартдиз Латвиядин сеймди гуьмбет чукIурунин гьакъиндай гзафбуру кхьей арзадин тереф хвена. Авторри гьисабзавайвал, шегьер азад хъувурбуруз эцигнавай гуьмбет гуя Латвиядин халкьдин рикIел “советрин оккупациядин” йисара хьайи азабрикайни азиятрикай рикIел хкизвай ярж я.
Шредера тереф хвена
1995-2005-йисара Германиядин канцлер хьайи Герхард Шредера Крым Россиядик акахьунин тереф хвена. Идакай “Ienta.ru” чешмеди хабар гузва.
Чешмеди кхьизвайвал, Шредера полуостров виликрай Россиядин мулк яз хьайиди къейдзава. Адан фикирдалди, Крым Россиядик ахкахьунин гьерекат халкьдин патай разивал аваз кьиле фена. Шредера Донбассда Украинадин терефди Минскдин икьраррал амал авунин важиблувални къейдна.
Гьазурайди — Куругъли Ферзалиев
