Бакуда яшамиш жезвай ахцегьви руш Юлизана Шафиевна Къухмазовадихъ музыкадин рекьяй еке алакьунар ава. Ам филососфиядин ва искусствоведенидин илимрин доктор, Муслим Магомаеван тIварунихъ галай филармониядин академиядин къвалав гвай гьукуматдин капелладин хормейстер, Узеир Гьажибегован тIварунихъ галай музакадемиядин хордин дирижированидин кафедрадин доцент, Азербайжан республикадин лайихлу артистка я.
Юлизана 1968-йисан 1-июндиз Ахцегьа дидедиз хьана. Сумгаитда юкьван мектеб, 1988-йисуз Гьажибегован тIварунихъ галай музучилище куьтягьна. Пешекарвал мадни хкажунин ва кьилин образование къачунин мурад авай бажарагълу руш У.Гьажибегован тIварунихъ галай госконсерваториядин “Хордин дирижирование” факультетдик экечIна.
1996-йисалай Азербайжандин госфилармонияда капелладин хормейстервиле кIвалахзава. Гьа са вахтунда 1997-йисалай инихъ У.Гьажибегован тIварунихъ галай музакадемиядин хордин дирижированидин кафедрадин муаллим яз кIвалахзава. 2008-йисалай и кафедрадин доцент я. Юлизана Шафиевнади 2016-йисуз “Эволюция жанра хоровой миниатюры в творчестве азербайджанских композиторов” темадай илимрин кандидатвилин диссертация хвена.
Шаир Ашик Вейселан 125 йисан юбилейдинди тир алай йис Туьркияда шаирдинди яз малумарнава. Идахъ галаз алакъалу яз, музыкадин рекьяй алакьунар авай пешекарар патал махсус проектни малумарнава. Проектдин метлеб ашкъи авайбуру Ашик Вейселан шиирриз кхьенвай музыкадин композиция ракъуруникай ибарат я. Жуьреба-жуьре мярекатра, проектра иштиракзавай Ю.Къухмазовани кьулухъ галамукьнач. Ада шаирдин “ЧIулав накьв” шиирдиз хордин музыка кхьена. Ада туькIуьрай хордин маниди гьейранарай проектдин сагьибри А.Вейселан 125 йисан юбилейдиз талукьарнавай концерт авай юкъуз Юлизанадизни Анкарадиз атун, хордин манияр патал шаирдин чIалариз мад кьве музыка кхьин теклифна. Идалайни гъейри, 27-апрелдиз Анкарада Ю.Къухмазовадин манийрин концертни кьиле фена.
Ю.Къухмазовади республикадин ва международный жуьреба-жуьре конкурсра иштиракзава, анра къазанмишнавай хейлин агалкьунарни ава. Эхиримжи сеферда ада Украинада кьиле фейи конкурсда Гран-при къачуна.
Къуй устаддихъ мадни еке агалкьунар хьурай!
Куругъли Ферзалиев
