И йикъара Дагъустандин журналистикадив ва тарихдин илимдив чIехи магьрумвал агакьна. 87 йисан яшда аваз тIвар-ван авай публицист, журналист, тарихдин илимрин доктор, профессор, общественно-политический деятель Джонрид Назирович Агьмедов рагьметдиз фена.
Дж.Н.Агьмедов 1932-йисуз къадим Ахцегьа машгьур педагог ва писатель Назир Агъабегович Агьмедован хизанда дидедиз хьана. Ахцегьа юкьван школа, Москвада М.В.Ломоносован тIварунихъ галай госуниверситетдин журналистикадин факультет акьалтIарна, хайи Дагъустандиз хтайдалай кьулухъ ада республикадин кьилин газетар тир “Комсомолец Дагестана”, “Дагъустандин правда” газетра кIвалахна.
Инай ам КПСС-дин Дагъустандин обкомдиз школайринни илимдин отделдин заведующийдин къуллугъдал тухвана. Гьана кIвалахиз, ада аспирантурадани кIелна. Дагъустандин ва Кеферпатан Кавказдин печатдин тарихдай илимдин кандидатвилин, гуьгъуьнлай гьа и рекьяй докторвилин дережаяр хвена. 1984-йисалай инихъ ада ДГПУ-да зегьмет чIугвазвай, 1989-2007-йисара ина культурологиядин кафедрадиз руководство гузвай. Гуьгъуьнлай адакай ДГПУ-дин Гьуьрметлу профессор хьана. Ада студентриз “Дагъустандин халкьарин культура” предметдай лекцияр кIелзавай, жегьилриз ахлакьдин тербия гузвай.
Адан гъиликай 200-лай виниз илимдин кIвалахар, “Дагъустандин периодический печать”, “Кеферпатан Кавказдин милли печать”, “Дагъустан: 1970-йисан 14-май”, “Халкьдин игитвал”, “Ленин ва Дагъустан”, “ЦIийи Ах-цегь-наме”, “Алай аямдин Ахцегь-наме”, “Инсан ва адан инанмишвилер”, Гьажибег Гьажибегован, Ахцегь Мирзе Алидин, ахцегьвияр — стхаяр тир Пир-Али ва Видади Эмироврин гьакъиндай ктабар, маса затIар хкатна.
Вири йисара Джонрид Назировича “Лезги газетдихъ” галазни сих алакъаяр хуьзвай, хейлин хъсан теклифарни, меслятарни гуз хьана. Иллаки газетдин юбилейрин вахтунда ам чи кьилин амадагрикай сад тир.
Джонрид Назировичан агалкьунар адаз “РД-дин илимдин лайихлу деятель”, “Ахцегь хуьруьн Гьуьрметлу агьали”, государстводин маса шабагьар гуналди къейднава.
Чна рагьметлудан хизандиз, вири багърийриз, мукьва-кьилийриз, вири ахцегьвийриз башсагълугъвал гузва.
Джонрид Назирович Агьмедован экуь къамат садрани чи рикIелай алатдач.
«Лезги газетдин» редакциядин коллектив
