Мукьвара Грециядин Латакия шегьерда армрестлингдай Европадин чемпионат кьиле фена. Ана саки 30 уьлкведай атанвай 500 спортсменди чпин гъилерин къуватар ахтармишна. Са шумуд юкъуз кьиле фейи и акъажунра Къурушдал яшамиш жезвай бажарагълу пагьливанар, армрестлингдай Россиядин спортдин мастерар тир Рудин Селимханова (85 кг) ва Мугьаммад Везирова (80 кг) иштиракна.
Шад жедай кар ам я хьи, чи кьегьал рухвайри и сефердани чпиз хас тир тегьерда алакьунар къалурна. Чпихъ галаз къуватар алцумиз майдандиз экъечIайбурун винел инанмишвилелди гъалибвал къазанмишуналди, Рудинни Мугьаммад армрестлингдай Европадин чемпионвилин тIварариз лайихлу хьана. Мубаракрай! Аферин!
РикIел хкин: алай йисан февралдиз Сочида армрестлингдай кьиле фейи Россиядин чемпионатда чи пагьливанар 1-чкайриз лайихлу хьана. Рудинани Мугьаммада инлай виликни са шумуд сеферда Москвада спортдин и жуьредай кьиле фейи чемпионатра 1-чкаяр кьунай. ИкI, армспортдай Россиядин чемпионвилин тIвар Рудин Селимханова — 4, Мугьаммад Везирова 3 сеферда къазанмишна.
Малум тирвал, Грецияда къазанмишай агалкьунри чи пагьливанриз армрестлингдай Румыниядин Бухарест шегьерда кьиле фидай дуьньядин чемпионатда иштиракдай мумкинвал гуда. Чна Рудиназни Мугьаммадаз и акъажунрани гъалибвилер къазанмишун алхишзава.
Гьажи Къазиев
