Сулейманаз меркез Москов шегьердай
Съезддиз ша! — чар атана, эвердай.
Яргъал рекьиз, чи бубайри лугьурвал,
Сулеймана акваз хьана гьазурвал.
Ам сеъезддиз тефин патал зегьметар
ЧIугурбурни авай, ийиз туьгьметар.
“Куьгьне чухва, хипен бармак, шаламар
Алаз акур, хъуьреда чал аламар”.
Вири гафар кьулухъ хьана, Сулейман,
Московдиз физ гьазур хьанва, яз мугьман.
Ракьун рекье гьалтна адал дустарни,
ЦIададай тир шииррин мерд устIарни.
Садаз-садан чIал чидачтIан рахадай,
Шаирар тир фад гъавурда акьадай;
Урусатдин яргъал тир рехъ атIана.
Горькийд патав чи Сулейман атана.
“Ажеб хьана чун кьведни са яшарин
Ксар хьана, зун шаир яз маршарин.
Чи кьведанни фикир, хиял сад хьана,
Максум Горьки акунал зун шад хьана”.
Коллонный зал патарилай атанвай
Шаирривни писателрив ацIанвай.
Президиум, съезд кIватIай векилар,
Горькийдинни Сталинан шикилар.
Тамашайла Сталинан шикилдиз,
Шад хиялар къвез эгечIна фикирдиз.
Сулеймана, гьар са кIвалах кьатIана,
Гъиле-гъилди инал шиир атIана.
Доклад кIелдай, чараризни гъил ягъиз,
Максим Горький, ара-ара вил ягъиз,
Сулейманаз тамашзавай кисзаваз,
Акуна ам, са вуч ятIан гьиссзаваз.
Са арада, аватай хьиз ахварай,
Сулейманахъ амукьнач мад къвез кьарай.
Адаз, вичиз гаф гайиди ван хьана,
Трибунадихъ камар къачуз кIан хьана.
Путар галай саягъ кIвачер залан тир,
Вич яшариз итим тиртIан кьулан тир,
ГьакI ятIани, рикIи вилик чIугуна,
Горький вичиз тамашзаваз акуна.
“Зун съезддал туьрк чIалалди рахазва,
Айиб мийир, багъиш ая, — лагьана,
КIан яз, Ленин, Сталинни акуна,
Атайла зун, Горькиди зи гъил кьуна…”
Сулейманан чIаларин ван хьайибур,
Залда тIимил авачир кIан хьайибур.
Совет власть — халкьдиз гайи азадвал,
Эвер гузвай хуьз бейтералд, чи садвал.
Коллонный зал шад капари зурзурна,
Сулейманаз Горькийди тIвар гьазурна.
Авай кьван халкь шумудни са вишералд
Сулейманаз яб гуз, алай кIвачерал.
Горький экъечI авур чIавуз эхирдай,
Речь рахана, гьар са рикIиз таъсирдай:
“Заз кьуьзуь кас, президумда ацукьна,
Мурмур ийиз акур зун гьакI амукьна.
Писателрин атана чи съезддал,
Сулеймана, лугьун патал гьевесдал,
Ам майдандиз викIегь яз икI атайла,
Шад хьана заз, гьар са гаф дуьз рахайла.
Ахпа ада — Гомера къад виш йисан
Вичин чIалар кIел авуна лап хъсан!
За минетда жавагьирар куьн патал!
Теснифзавай ксар куьне хуьн патал!”
Зал мад кIвачел вири сад хьиз къарагъна,
“Сагърай Сулейман!” — лугьуз хьана, гьарагъна.
Сулейманан билбилдин ван хьайибур,
Адав рахаз кIанз, къекъвезвай вирибур.
Амма ада, дегиш тийиз къекъуьнар,
Алахънавай ийиз кIанз вич секинар.
Тарифри кьил квадар тавур Сулейман
Гьар са касдин ам акун тир эрзиман.
Сулейман вич амаз Москов шегьерда,
Дагъустанда шадвал авай тегьерда,
Азиз кас хьиз, къарши авун паталди,
Цуькверни гваз, вилив хуьзвай кIватIалди.
Кьасумхуьрел, терсепулдин майдандал,
Пионеррин галстукар гарданда.
Шад хабар гваз агакьайла эллерал,
СтIал Сулейман хкажна гъилерал!
Сажидин, шаир
