И йикъара Кьурагь хуьре авай райондин спортдин гегьенш майдандал Сив хуьнин сувариз талукьарна, чIемерукдай хьел ягъунай, цIил ялунай ва турникдал къугъунай акъажунар кьиле фена. Идакай «Лезги газетдиз» райондин администрациядин пресс-къуллугъди хабар гузва.
Акъажанур тешкилайбур РД-дин Муфтият ва Кьурагь райондин спортдин ва жегьилрин крарин рекьяй отдел я.
Кьурагь райондинбурулай гъейри, акъажунра къуншидаллай Хив райондин спортсменрини иштиракна. Санлай къачурла, иштиракайбурун кьадар 100-далайни гзаф тир.
Акъажунрив эгечIдалди вилик спортсменрин ва тамашачийрин вилик хатасузвилин рекьяй райондин кьилин заместитель Альберт Исаев, ЮТО-да РД-дин Муфтиятдин марифатдин отделдин векил Шамиль Омаров ва Кьурагь райондин имам Магьди Апаев хъсан келимаяр рахана.
Дуствилелди ва къизгъиндаказ кьиле фейи акъажунрин нетижада чIемерукдай хьел ягъунай сад лагьай чка Хив райондай тир Жамбул Малалиева кьуна. Кьвед ва пуд лагьай чкаяр Шамиль Омаровани Гьасан Гьажиева (Кьурагь район) кьуна. Турникрал къугъунай сад лагьай чка Умар Омарова, кьвед лагьай чка Вагьид Мегьамедова ва пуд лагьай чка Жамалдин Рагьимханова кьуна. Абур вири Кьурагь райондин агьалияр я.
ЦIил ялунин акъажунра Кьурагь райондин «Гияр» команда виридалайни къуватлу хьана. Кьвед лагьай чка «Кьурагь-1» командади, пуд лагьай чка «Тавакуль» командади (Кьурагь район) ва кьуд лагьай чка «ЗахитI» командади (Хив район) кьуна.
Акъажунрин нетижаяр райондин спортдин ва жегьилрин крарин рекьяй отделдин начальник Рамиз Рамазанова кьуна. Ада иштиракайбуруз, акъажунар тешкилунин карда куьмек гайибуруз чухсагъул малумарна. Гъалибчийривни хъсан чкаяр кьурбурув медалар, грамотаяр ва къиметлу савкьатар вахкана. Лишанлу савкьатар вири иштиракчийриз гана.
«Лезги газет»
