Къенин чи ихтилат фадлай Москвада яшамиш жезвай ва ана кIвалахзавай физикадинни математикадин илимрин доктор, профессор Нежеф Экбербубаевич Саркаровакай я. Ам 1946-йисуз Мискискарин хуьре дидедиз хьана. Усугъчайдин мектеб, ахпа 1971-йисуз МГУ-дин физикадинни математикадин факультет, 1976-йисуз МГУ-дин аспирантура агалкьунралди куьтягьна. Гьа йисуз гужлу лазеррин кIвалахдин нетижалувал хкажунин ва лазердин ери хъсанарунин мумкинвилерин месэлаяр ахтармишнавай илимрин кандидатвилин диссертация хвена.
Еке алакьунар авай алимди вичин зегьметдинни илимдин рехъ 1976-йисалай Москвадин “Алмаз” ЦКБ-да (Центральное конструкторское бюро) кьилин инженервиле кIвалахунилай башламишна. Са тIимил вахтундалай адакай ина илимдин кьилин къуллугъчи, лабораториядин начальник ва гуьгъуьнлай отделдин начальник хьана. 1987-йисуз конкурсдин бинедаллаз Н.Саркаров атомдин энергиядин институтдин филиалдиз илимдин кьилин къуллугъчи яз рекье туна. 1990-йисалай датIана кIвалахдай гужлу лазеррин лабораториядин начальник я.
Нежеф Саркарова 2000-йисуз физикадинни математикадин рекьяй илимрин докторвилин диссертация хвена. Алай вахтунда ам РФ-да, СНГ-да ва Европада чапнавай 170-далайни гзаф илимдин кIвалахрин автор я.
Вини дережадин пешекар хьиз, Нежеф Экбербубаевич лазеррин ва лазеррин технологийрин рекьяй СНГ-дин уьлквейрин милли экспертрин коллегиядин, лазердин ассоциациядин, международный SPIE/RUS тешкилатдин милли отделенидин ва ДГТУ-дин диссертацийрин советдин член, Росатомдин илимдинни техникадин рекьяй эксперт я.
Илим вилик тухузвай машгьур лезги алимдин лайихлувилер жуьреба-жуьре шабагьралди, тIварар гуналди къейднава. Ам Ленинский комсомолдин премиядин, СССР-дин Министррин Советдин тафаватлувилин лишандин, “ВВЦ-дин лауреат” ва “Москвадин 850 йис” медалрин сагьиб я.
Къуй бажарагълу алим мадни вини дережайрив агакьрай!
Куругъли Ферзалиев
