Мукьва уьлкве
“Чун патал Белоруссия виридалайни мукьва уьлкве, стратегиядин рекьяйни чи кьилин терефдар-амадаг я”, — лагьана “Новости” РИА-ди хабар гузвайвал, Россиядин МИД-дин кьвед лагьай департаментдин директор Андрей Руденкоди.
23-майдиз малумарайвал, Белоруссиядиз Россиядин газ маса газдалди эвездай фикир ава. Белоруссияда Россиядин посол Михаил Бабич къуллугъдилай элячIайдалай кьулухъ, 30-апрелдиз, адан чкадал Дмитрий Мезенцев тайинарна. СМИ-ри кхьена хьи, Россиядин Президентди Белоруссиядин президентдивай са шумудра кьилди тIалабайдалай кьулухъ Бабич кIвалахдилай алудунин къарар кьабулна.
Гуьгъуьнлай Россиядин МИД-ди къейд авурвал, посол дегишарун кьве уьлкведин арада алакъаяр къайи хьунихъ галаз алакъалу туш. Госдумада малумарайвал, цIийи посолдин виликни Бабичан вилик хьтин месэлаяр акъвазнава.
Мад са къурбанд
Екатеринбург шегьерда Уральский федеральный университетдин къвалав гвай лицейдин ученикди математикадай имтигьан жедалди вилик вичин чандиз къаст авуна. Идакай, Свердловский областдин силисдин комитетдин управленидин пресс-къуллугъдал асаслу яз, “Ura.ru” чешмеди хабар гузва.
СК-дин руководителдин куьмекчи М.Чалкован гафарай, силисдин кIвалахдив эгечIдалди тухудай ахтармишунар тайинарнава, агьвалатдин себебар дуьздал акъудзава.
Апрелдин вацра малумарайвал, Россияда аялри чпин чандиз къаст авунин дуьшуьшар 2017-йисалай инихъ артух жезва, абурун кьадар саки 800-дав агакьнава. Аялрин ихтияррин рекьяй Россиядин Президентдин векил Анна Кузнецовади къейдзавайвал, ихьтин делилри “аялар чеб чпин ихтиярда авайвилин, абурук къалабулух кутазвай месэлайриз садани яб тагузвайвилин” гьакъиндай шагьидвалзава.
Идалай вилик ЕГЭ мукьва хьайи вахтунда Россиядин школьникри чпи чпин чандиз къаст авунин вилик пад махсус программадин куьмекдалди кьазвай. Программадин сергьятра аваз психологди диде-бубайрихъ галаз суьгьбетдин собранияр тухузва. Пешекаррин фикирдалди, эгер жаванар мукьвал-мукьвал кьиникьикай рахаз ва абуру чпин гележегдиз пис къимет гуз хьайитIа, диде-бубайри мукъаятвал квадарна виже къведач.
Яракьар ракъурзава
Сириядин гьукуматдин кьушунри Россиядин куьмекдалди кьиле тухузвай гьужумрихъ галаз женг чIугун патал Туьркияди Сириядин Идлибда авай дявекарриз яракьар ракъурунин гьерекатар артухарнава. Идакай “Reuters” чешмеди хабар гузва.
Къейдзавайвал, Анкаради ихьтин къарар Туьркиядиз катзавайбурун «сел» акъвазарунин мураддалди къизгъин къалмакъал арадай акъудун патал Москва инанмишариз кIан хьайи нетижасуз алахъунрилай кьулухъ кьабулна. Туьркиядин терефдиз Сириядин кефердинни рагъакIидай пата вичин къуватар хуьз ва мадни артухариз кIанзава.
Февралдиз Туьркиядин президент Р.Эрдогана Анкаради Россиядин Сирияда авай Хмеймим база боевикрин гьужумрикай хуьз куьмек гузвайдакай малумарнай.
Ришветбазрин эменни — кесибриз
Мексикадин гьукуматди, ришветбазрин кIвалер, чилер ва автомобилар тулкI авуна (аукцион) маса гуналди, кесиб ватандашриз куьмек гудай къарар кьабулнава. Идакай “The Guardian” чешмеди хабар гузва.
Эменни тIимил авайбуруз куьмек гунин программадал “Робин гуд” тIвар акьалтнава. Ришветбазрин шейэр маса гана, хьайи пулдин такьатар яшайишдин проектар кьилиз акъудун патал муниципалитетриз ракъурдайвал я. “Тахсиркарривай вахчунвай вири затIар жемятдив, сифте нубатда кесибрив агакьарда”, — малумарна Мексикадин президент Андерс Мануэль Лопес Обрадора.
26-майдиз 82 автомобиль маса гудай сад лагьай тулкI кьиле фена. Санлай къачурла, абурун къимет тахминан 97 миллион манатдив агакьзава. Абурулайни гъейри, виликан сиясатчидин пуд кIвални маса гудайвал я.
Къейд ийин, 2018-йисан сентябрдиз Мексикадин президентди уьлкве банкрот хьайидакай малумарнай.
Къуватар артухарзава
США-дин президент Д.Трампаз Ирандихъ галаз алакъаяр пис хьуникди Мукьвал тир шаркь патаз алава яз мад са шумуд агъзур аскер ракъурдай фикир ава. Идакай “The WaII Street JournaI” чешмеди малумарна.
Къейдзавайвал, США-дин гьукумдарри кьве агъзурдалай пуд агъзурдав агакьна аскерар ва терефдарриз чкадал яракьар тухун патал миллиардралди долларар ракъурдайвал я.
Гимийринни авиациядин къуллугъчияр квачиз, алай вахтунда Иракда, Афгъанистанда ва Сирияда, Америкадин 20 агъзурдав агакьна аскерар ава. 23-майдиз малумарайвал, США Ирандихъ галаз дяве тухуниз гьазур хьанва. Амма адалай вилик Трампа Ирандихъ галаз дяве тухудай фикир авачирдакай лагьанай.
Вашингтондинни Тегерандин алакъаяр чIур хьайи чIавуз Персидский заливдиз США-дин ВМС-дин кьве гими гьахьнай. Адалай вилик Америкадин армияди вичин аскерар Иракда вини дережада гьазур хьанвай гьалдиз гъанай.
США-динни Ирандин алакъаяр са йис идалай вилик чIур хьана. 2018-йисан майдиз Трампа 2015-йисан ядерный икьрардай Вашингтон экъечIнавайдакай ва Тегерандиз акси санкцияр кардик кухтунвайдакай малумарнай. США-ди Ирандиз акси яз малумарнавай сергьят эцигунин серенжемар ноябрдиз къуватда гьатна.
Гьазурайди — Куругъли Ферзалиев
