Мукьвара Мегьарамдхуьруьн райондин Советский хуьре боксдай РД-дин чемпион Къазанбег Юлчиев рикIел хкуниз талукьарна жегьилрин арада боксдай акъажунар кьиле фена.
«Лезги газетдиз» Сулейман-Стальский райондин пресс-къуллугъди хабар гузвайвал, райондин спортдин, туризмдин ва жегьилрин крарин рекьяй комитетди турнирда иштиракун патал Герейханов хуьруьн 2-нумрадин ДЮСШ-дин тренер Роберт Нагъиеван регьбервилик кваз 11 жаван спортсмендикай ибарат команда рекье туна. Санлай къачурла, спортдин акъажунра республикадин шегьеррайни районрай 14 командади иштиракна.
Чешмеди къейдзавайвал, Р.Нагъиеван гъилик вердишвилер къачузвай боксерри акъажунра агалкьунар къазанмишна. ИкI, абур вири финалдиз акъана. Акъажунрин нетижада Сулейман-Стальский райондай тир Эльмар Абдулазизова, Рамазан Яхияева, Амин Таибова, Илгьам Мевлидинова, Абдурагьим Шихабдулаева, Рамазан Султанова ва Тарлан Яхияева 1-чкаяр кьуна. Амир Таибов, Бахтияр Гьажимегьамедов, Имам Гьажибалаев ва Шихмамед Тагьиров кьвед лагьай чкайрин сагьибар хьана.
Гъалибчиярни хъсан чкаяр кьурбур кубокралди, медалралди ва дипломралди къейдна.
«Лезги газет»
