Уьлкведин жуьреба-жуьре регионра яшамиш жезвай машгьур ва чешнелу лезгийрикай чаз къвердавай гзаф малум жезва. Вичикай ихтилат физвай военный летчик, генерал-майор Тагьир Минетуллагьович Гьажиевни чи халкьдин лайихлу векилрикай сад я.
Т.Гьажиев 1960-йисуз Кьурагь райондин Штулрин хуьре дидедиз хьана. 1977-йисуз ада Белиж поселокдин 1-нумрадин юкьван мектеб тафаватлудаказ куьтягьна, ам маршал В.А. Судецан тIварунихъ галай Ставрополдин ПВО-дин летчикар ва штурманар гьазурдай военный авиациядин кьилин училищедик экечIна, анаг яру дипломдалди куьтягьна.
1992-йисуз, эскадрильядин командирдин къуллугъдал алаз, вини дережадин чирвилер ва алакьунар авай ватанэгьлиди ПВО-дин ВВА (Военная воздушная академия) къизилдин медалдалди куьтягьна.
Гуьгъуьнлай ада авиация женгера ишлемишунин рекьяй чирвилер гудай Астрахань шегьерда авай центрадиз регьбервал гана. Адакай “Астрахандин авиалинияр” ОАО-дин регьберни, Сибирдин военный округдин ПВО-дин 41-дивизиядин командирни, 2011-2012-йисара “Международный аэропорт Волгоград” ОАО-дин генеральный директорни, Краснодарский крайдин Крымск шегьердин гвардиядин авиациядин дивизиядин командирни хьана.
Россиядин Генштабдин махсус курсара хьайидалай кьулухъ Тагьир Минетуллагьович Чита шегьердин дивизиядин командирдин заместителвиле тайинарна. РФ-дин кеферпата ВКС-дин дивизиядин командирвални авуна. Ада Чечен ва Абхазия республикайра кьиле фейи женгерин гьерекатра иштиракна.
Машгьур ватанэгьли “РФ-дин лайихлу военный летчик” тIварцIин, Ватандин вилик лайихлувилерай махсус ордендин сагьиб я. Генерал-майор лагьай тIвар адаз РФ-дин Президент В.Путинан къарардалди 2017-йисан 22-февралдиз гана. Пешекарвилин рекьяй вини дережадин летчикди Су-15, Миг-25, Су-27, Миг-29, Миг-31 самолетар ишлемишна. Санлай къачурла, ада 20 агъзур сятда самолетар идара авуна.
Тагьир Гьажиев алай вахтунда Кеферпатан Осетия — Алания республикадин военком я. Баркаллу ватанэгьлидихъ къуй мадни зурба агалкьунар хьурай!
Куругъли Ферзалиев
