И йикъара Ахцегь райондин администрацияда райондин кьил Осман Абдулкеримова къурулушрин жавабдар къуллугъчийрихъ галаз нубатдин совещание кьиле тухвана.

«Лезги газетдиз» Ахцегь райондин пресс-къуллугъди хабар гайивал, совещанидал алай кьилин месэла агьалияр хъвадай ерилу целди таъминарунихъ галаз алакъалуди тир.

Хъвадай яд хъсанди, ерилуди хьунин ва гузвай вахт тайинарунин месэла веревирд авур совещанидал райондин кьили малумарайвал, са бязи ахцегьвийрилай наразивилин арзаярни атанва. Агьалийри хъвадай цин патахъай арзаяр авунин себебрикай райондин кьили УЖКХ-дин начальник Фиридин Магьмудовавай хабар кьуна.

Жавабдар къуллугъчиди малумарайвал, арадал атанвай гьалар инсанри хъвадай яд лазимсуз чкайриз ишлемишунихъ галаз алакъалу я, кьилди къачуртIа, бязибуру хъвадай яд салар дигин патал ишлемишзава. Идалайни гъейри, са шумуд йис идалай вилик кутунвай турбаярни къенин игьтияжриз жаваб гудайбур яз амач. Гьа са вахтунда насосар кутуникдини, са гуьзчивални авачиз акатай чкайрилай турбаяр атIуз яд тухуникдини цин кьадар тIимил жезва.

Къейднавай месэла гьялун патал райондин кьил О.Абдулкеримова махсус комиссиядал ахтармишунин серенжемар кьиле тухун тапшурмишна. Эгер лазимсуз чкайра хъвадай яд ишлемишзавай дуьшуьшар хьайитIа, талукь тир серенжемар кьабулунин ва тахсиркарар административный жерме авунин къарар кьабулдай фикирдал атана.

«Лезги газет»