18-майдиз Хасавюрт райондин Къурушрин хуьрени классик, ХХ асирдин­ Гомер дидедиз хьайидалай инихъ 150  йис тамам хьуниз талукьарнавай мярекат кьиле тухвана. Ана 1-нумрадин юкьван школадин директор Гьажиметов Ислама, тербиядин рекьяй завуч Велиметов Мегьамеда, профсоюздин комитетдин председатель Лазимов Акифа, муаллим-ша­ир Хидиров Шагъназара, лезги чIа­ланни литературадин муаллимар тир Гьасанов Сейфуллагьа, Мамедов Элес­кера, Дадашева Эрзиди ва ма­са муаллимри, чIе­хи классра кIелза­вай аялри иштиракна. Хуьруьн библиотекадин заведующий Дадашева Сулмаза СтIал Сулейманан уьмуьрдин­ ва яратмишунрин рекьериз талукьарнавай махсус выставка гьазурнавай.

Мярекат СтIал Сулеймана СССР-дин писателрин сад лагьай Съезддал кIелай шииррилай башламишна.

Дагъустандин лайихлу, лезги чIалан­ни литературадин муаллим тир и цIара­рин авторди СтIал Сулейманан 150 йисаз, адан уьмуьрдин ва яратми­шунрин рекьериз талукьарнавай гегьенш доклад авуна, шаирдикай вичин фикирар лагьана. Хейлин ксари шаирдиз бахшнавай чпин шиирар, чIехи классра кIелзавай аялри СтIал Сулейманан эсерар таъсирдайвал кIелна.

“Къуруш ТВ”-дин оператор Аливердиев Бешира и мярекат лентиниз къачуна. Эхирдай мярекатда иштиракай аялризни муаллимриз школадин директордин  къул алай грамотаяр гана.

Гьажи Къазиев