Дагъустандин халкьдин шаир СтIал Сулейманан 150 йисан юбилейдин сергьятра аваз, 16-майдиз Сулейман-Стальский районда лезги чIалал диктант кхьинин серенжем кьиле фена. «Лезги газетдиз» райадминистрациядин пресс-къуллугъди хабар гузвайвал, лезги диктант кхьинин серенжемда 2 агъзурдав агакьна инсанри иштиракна.

«Хайи чIал чизва – жуваз жувни чизва!» лишандик кваз кьиле тухвай диктант райондин руководстводи, тешкилатрин къуллугъчийри ва хейлин маса агьалийрини кхьена.

Вирибуру 45 декьикьада 173 гафуникай ибарат диктант кхьиналди, лезги чlалай чпихъ авай чирвилер къалурна. Махсус комиссияди виридаз талукь умуми диктантдин нетижаяр кьурдалай кьулухъ малум хьайивал, санлай къачурла, кхьей кIвалахрин еридин процент 80-дав агакьна.

Тешкилатчийри малумарайвал, диктант кхьейбуру гзафни-гзаф дуьз речь ва са жинсинин членар квай предложенийра пунктуациядин ва маса бязи гъалатIриз рехъ ганвай.

«Лезги газет»