Алай вахтунда сив хуьнин варз хьуниз килигна, республикадин жуьреба-жуьре пипIера ифтарар (сив кьунвайбуру нянихъ незвай хуьрекар) кьиле тухун патал алачухар тешкилзава. ИкI, Рамазандин вацра сив хуьзвай 4 агъзурдалайни гзаф инсанар гьакьдай алачух мукьвара Дагъустанда ахъайнавай. Ихьтин регьимлу серенжемар тешкилунин кардик республикадин муькуь шегьеррини, районрини кьил кутазва.

«Дагъустан» РИА-ди хабар гузвайвал, ифтарар тешкилзавайбур гзаф ава, амма «Инсан» тIвар алай фондуни и хъсан кардик иллаки кьетIен пай кутазва.

Малумарзавайвал, Дагъустан республикадин кьил Владимир Васильева пак вацра са шумуд юкъуз ифтарар тешкилунин кар вичин хивез къачуна. Адан куьмекдалди Махачкъала шегьердин жуьмя мискIиндин патав гьар нянихъ ифтарар кьиле тухузва.

«Лезги газет»