15-майдиз Дербентда, СтIал Сулейманан тIварунихъ галай ял ядай багъда, Дагъустандин халкьдин шаир СтIал Сулейманан 150-йисан юбилейдиз талукь мярекат кьиле фена. Идакай «Лезги газетдиз» «Дербентдин хабарар» чешмеди хабар гана.
Шегьердин культурадин, спортдин, жегьилрин сиясатдин ва туризмдин управлениди тешкилай мярекатда Дербент шегьердин кьилин сад лагьай заместитель Рустамбег Пирмегьамедова, шегьердин администрациядин кьилин заместитель Видади Зейналова, шаир, Дагъустандин писателрин союздин Дербент шегьердин отделенидин председатель Кичибег Мусаева, СтIал Сулейманан тIварунихъ галай гьукуматдин лезги театрдин директор Динара Эминовади, шегьердин ЦБС-дин Диана Алиевади ва масабуру иштиракна.
Лезги театрдин артистри лезги чIалал манияр тамамарна, шегьердин 21-нумрадин мектебда кIелзавай аялри чIехи шаирдин шиирар фасагьатдаказ кIелна. СтIал Сулейманан ролда Россиядин лайихлу артист, Лезги театрдин актер Абдуллагь Гьабибов къугъвана.
Мярекатдал шегьердин кьилин сад лагьай заместитель Рустамбег Пирмегьамедов, шаир Кичибег Мусаев, лезги театрдин директор Динара Эминова ва масабур рахана.
«Лезги газет»
