Лезгийрин алай аямдин тIвар-ван авай бажарагълу манидар, милли меденият вилик тухуник еке пай кутазвай Жамиля Фахреддиновна Заловадикай гзафбуруз ван хьана жеди.
Ам 1979-йисуз КцIар райондин Чипиррин хуьре дидедиз хьана. 2001-2003-йисара ада С.Мирзаеван тIварунихъ галай манидарвилин мектебда кIелна. Мадни чирвилер къачунин мураддалди, алакьунар авай артистка 2003-йисуз Асеф Зейналлыдин тIварунихъ галай музыкадин колледждик экечIна. 2006-йисуз колледж куьтягьайдалай кьулухъни гзаф манидарривай-устадривай тарсар къачуна. И рекьяй ада вичин кьилин муаллим ва насигьатчи Азербайжандин халкьдин артист Забит Набизаде яз гьисабзава.
Ада машгьур шаир Седакъет Керимовади арадал гъайи “Сувар” ансамблдин Бакуда кьиле фейи гзаф концертрани иштиракиз хьана, гьакIни хейлин фестивалра ва маса мярекатра иштиракзава.
2012-йисуз артисткади хизан арадал гъана, алай вахтунда рушаз тербия гузва. Ж.Заловади къейдзавайвал, адан уьмуьрдин юлдашни искусстводиз мукьва инсан я.
2015-йисалай Жамиляди КцIар шегьердин аялрин художественный мектебдин мугъамматдин отделенида тарсар гуз эгечIна. И йисуз медениятдин мярекатра активнидаказ иштиракунай артисткадиз гьуьрметдин са шумуд грамота гана.
Хъсан сес ва мани тамамарунин алакьунар авай Заловадикай 2016-йисан 29-октябрдиз Москвада 18 уьлкведин векилрин иштираквал аваз кьиле фейи “Музыкальный Восток” конкурсдин гъалибчи хьана. 2016-йисан 30-ноябрдиз Бакуда адаз международный дережадин шабагьар шад гьалара вахкудай мярекатдал “Номер один” премия гана.
Манидарди Бакуда, Туьркияда, Къазахстанда, Москвада, Сумгаитда, Дербентда, Санкт-Петербургда, гьакIни Туьркиядин Балыкесирда яшамиш жезвай лезгийрин (абурун кьадар ана гзаф я) тIалабуналди гьанани концертар гана. Адан концерт авай юкъуз зал сиве-сивди ацIузва, билетар бес тахьайла, инсанрин тIалабуналди кьвед лагьай юкъузни концертдин кIвалах давамардай дуьшуьшар жезва.
Ихьтин чIехи мярекатар лезги халкьдин меденият, музыка раижунин макьсаддалди хизандин такьатрихъ кьиле тухузва. Ада лезгийрин Яран суварин, Ахцегьа гьар йисуз кьиле физвай “Шарвили” эпосдин гурлу мярекатрани иштиракзава.
“Заз чи манидарар лезги чIалаз таржума авунвай чарабурун манияр тамамаруникай, лезги манияр я лугьуз, абур халкьдал агакьаруникай къерех хьана кIанзава. Ихьтин гьалар себеб яз, чи музыкадин меденият квахьун мумкин я”, — лугьузва Ж.Заловади.
Халкьдин милли медениятдиз къуллугъзавай пешекардихъ къуй мадни чIехи агалкьунар хьурай!
Куругъли Ферзалиев
