Кьасумхуьрел кардик квай “Куьредин ярар” общественный культурадин центрадин типографияда Тегъи Мегьамедован “Агьвалатар” тIвар алай ктаб чапдай акъатна. Къейд ийин: Тегъи кIелзавайбуруз шииррин “Гьайиф зи хуьр” ва “Алибеган булах” ктабрин автор яз чида. “Агьвалатар” — им адан пуд лагьай ктаб я.
Куьруь къейд: Тегъи Мегьамедов 1961-йисан 27-мартдиз ЦицIигърин хуьре дидедиз хьана, 1966-йисалай ам Агъа СтIалрин-Къазмайрал яшамиш жезва.
Т.Мегьамедова Махачкъалада пешекарар гьазурдай 1-нумрадин училище, Горький шегьердин индустриально — педагогический техникум акьалтIарна, хейлин йисара Урусатда кIвалахна. Алай вахтунда хуьре яшамиш жезва.
“Агьвалатар” ктаб акъатун — им майдандиз цIийи гьикаятчи, — юморист атанва лагьай чIал я.
Тегъи Мегьамедов хуьруьн чкада (гьам Дагъустанда, гьам Урусатда) яшамиш жезвай кас я, яни ам халкьдин, жемятдин арада ава. Гьавиляй адан гьикаяйра, юмордин эсерра, рекьерин къейдера кьилин игитарни хуьруьн агьалияр я. Вичиз акур ва ван хьайи крарикай авторди литературадин эсерар арадал гъизва, и кар адалай устаддаказ алакьни ийизва, кхьинин чIални, лугьудайвал, регьятди я.
“Агьвалатар” ктаб мубарак авуналди, чаз чи яр-дуст, къелемдин стха Т.Мегьамедовахъ мягькем сагъвал, яратмишунрин рекье мадни еке агалкьунар хьана кIанзава.
Хазран Кьасумов
