СтIал Сулейманан 150 йис вирида шадвилин гьалара къейд ийизва, адан ватанэгьлийри, гьарда вич алай чкадал чи район мадни магьшур хьун патал, галатун тийижиз, зегьметни­ чIугвазва. Агъадихъ за, жуван иштираквални аваз, са шумуд чкада кьиле фейи гуьруьш­ри­кай рикIел хкунар куь фикирдиз гъизва. (Киевда Сулейманан куьчедин суварикай за виликрай кхьенай).

Бакуда юбилей

1994-йисуз Бакуда Азербайжандин М.Магомаеван тIварунихъ галай госфилармонияда СтIал Сулейманан 125 йисаз талукьарнавай гурлу межлис хьанай. Ам Азербайжандин культурадин министерстводи, писателрин со­юзди, “Самур” милли меркездин седри, профессор Али Мусаева, Азербайжан-Дагъустан тешкилатдин регьбер, профессор Панагь Халилова, шаирар тир К.Келентарова, Къаби­ла, журналист Седакъет Керимовади тешкилнавайди тир. Аниз КцIар райондин исполкомдин кьил И.Амировни галаз Сулейман-Стальский рай­ондай КПСС-дин райкомдин секретарь М.Ме­гьамедрагьи­мов, СтIал Сулейманан хтул Лидия Стальская ва зунни фенвай. Мяре­кат­дал рахай писателрин союздин председатель Анара, “Самур” милли меркездин чIе­хиди тир Али Мусаева ва маса юл­дашри СтIал Сулейман чпиз мукьвади, адан яратми­шунар вири халкьди кIелзвайди, 1957-йисуз Жафар Жафарлидин тIварунихъ галай  Азербайжандин киностудияда профессор Риза Тегьмасибан регьбервилик кваз СтIал Сулейманакай арадал гъайи “Мани икI туькIуьрзава” тIвар алай художественный фильм гьазурайди рикIел хканай.

Новороссийскда сувар

Гьа ихьтин гуьруьш Новороссийск ше­гьер­да яшамиш жезвай лезгийрин векилрини тухвана. СтIал Сулейманан куьчедин сувар тешкилна. Аниз Лезгийрин госмуздрамтеатрдин директор Алибег Мусаев, шаирар — Шагьабудин Шабатов ва Сажидин фенай. И куьруь ри­кIел хкунралди заз СтIал Сулей­манан шиирар гьамиша яз, алай ва къвезмай несилризни кIелиз хуш  жедайди тестикьриз кIанзава.

Сажидин Саидгьасанов