«Михьи уьлкве» лишандик кваз 27-апрелдиз кьиле фейи Вирироссиядин субботник Мегьарамдхуьруьн райондани гегьеншдаказ кьиле фена. Идакай «Лезги газетдиз» райадминистрациядин пресс-къуллугъди хабар гана.

Чешмеди къейдзавайвал, субботникдин кIвалахда райондин 28 агъзур кьван агьалиди иштиракна. Районда ихьтин серенжемар 1-апрелдилай инихъ са шумуд сеферда тешкилна.

Хуьрерин администрацийрин, образованидин ва маса идарайринни тешкилатрин дестейри экологиядин мярекатда дуствилелди иштиракна. Нетижада хейлин дараматрин винел патан акунар хъсан гьалдиз хкана, лазим чкайриз шир яна; гьаятар, куьчеяр зирзибилрикай михьи авуна; тарарихъ гелкъвена, абуруз киреж яна. И юкъуз райондин гьар са пипIе кIвалах ргазвай. Умуми бигердик жегьил несилрини, чIехи несилрини чпин пай кутуна. Райондин кьил Ф.Агьмедова тешкиллувилелди кьиле фейи кIвалахдиз хъсан къимет гана.

Къейд ийин, 27-апрелдиз «Михьи уьлкве» лишандик кваз Докъузпара, Ахцегь ва маса районрани, шегьеррани гьегьенш субботникар кьиле фена.

«Лезги газет»