Накь авай чи пIинидин багъ цуькведа,

Къе цуьквериз басрух гузва живеди.

Беневшаяр кьил агъузна пашман я,

Лугьуз: “И жив гьинай атай душман я…”.

 

Апрелдин варз юкь ятIани гатфарин,

Мекь янава адан къацу юрфариз.

Муг туькIуьриз хъач сивевай билбилни

Тарцин хилел ацукьнава сефилдиз.

 

Зунни ава тухвана бул фикирри,

Сад Аллагьдиз ялвар ийиз, зикириз:

“Я Иллагьи, цавун кьакьан бушлухар,

Гатфариз чаз герек тирни живни хар…”.

 

Гьа икI лугьуз хтана зун къецелай,

Пашман шиир алат тийиз мецелай.

Гуьзлемишиз мекьи апрель алатун,

ПIинид багъдин гьайиф чIугваз ама зун…

Нариман Къарибов