И мукьвара чав Махачкъа­лада, “Мавел” чапханада гьазурнавай “Рухун-наме” ктаб агакьна. Адан автор гьа и хуьруьнви (гила Сулейман-Стальский райондин ЦIийи Макьарал куьч хьанва) агъ­сакъал, Мегьамедан хва  Рамазан  Эмир­гьам­заев  я.

Лагьана кIанда, идалай вилик ада вичин улу-бубайрикай тир Рухун Алидин ирс (шиирар) кIватI хъувуна ва кьилдин ктаб яз кIелдайбурув ахгакьарна. Сифте яз чIехи шаирдин ши­килни арадал хкана. Дагъустандин халкьдин шаир Арбен Къар­­­да­ша абур урус чIалазни элкъуьрна.

Гила акъуднавай ктаб тамамвилелди куьгьне хуьруьн тарихдиз, анин инсанрин кьадар-кьисметдиз, мулкариз, экономикадин мумкинвилериз талукьарнава. Тарихдин хейлин рекъемриз, шикилриз чка ганва.

Ктабда мад сеферда шаир Рухун Алидикай тарихда ла­гьан­вай келимаяр (Ярагъ  Мегьа­меда, Ацегь Мирзе Алиди, Алкьвадар Гьасана ва масабуру), шаирдин эсерар чапнава. Абурал Алидин ирссагьиб Ру­хун Магьмудан эсерарни,  халкьдин сиверай кIватIнавай къаравилиярни алава хъувунва.

Агъсакъалди кIелдайбуруз мусурман диндин шар­тIари­кай­ни хейлин чирвилер гузва. Куьрелди, цIийи ктаб агъсакъалдин патай вичин хуьруьнвийриз, тарихдал ва эдебиятдал рикI алайбурузни хъсан савкьат хьанва.

Чи мухбир