Тарихдин ва культурадин ивиррин макан тир къадим Дербентдин музейра мукьвал-мукьвал жуьреба-жуьре выставкаяр, килигунар ачух жезва, шегьердин мугьманрихъ, чкадин жегьил несилдин векилрихъ (мектебрин аялрихъ, студентрихъ) галаз шегьердин тарих, хайи ерияр чируниз талукь гуьруьшар тешкилзава.
Ингье шегьердин музейрин коллективрин кIвалахдикай са шумуд мисал. Мукьвара Нарын-къеледа “Зурба ипекдин рехъ” лишандик кваз Татарстандин Елабугадин музей-заповедникдин выставка ачухнава. Ам шад гьалара ачухуниз талукь мярекатда Татарстандай тир мугьманри — Елабугадин МР-дин кьилин заместитель Зульфия Сунгатуллинади, анин музей-заповедникдин директор Гуьлзада Руденкоди, Дербентдин музейрин илимрин къуллугъчийри, шегьердин общественностдин векилри иштиракна.
Гзаф маракьлу и выставкада 9 уьлкведин 46 художникдин графикадин композицийрин, живописдин ва декоративно-прикладной искусстводин 80-далайни виниз эсерар къалурзава.
* * *
Алай йисан мартдин юкьвара Кострома шегьерда «Дербент легендарный, Дербент исторический» лишандик кваз выставка кардик акатнава. Ана Дагъустандин, гьа жергедай яз Дербентдинни, къадим шегьердиз талукь живописдинни графикадин шикилар, милли алукIунар, халичаяр ва заргаррин шейэр къалурнава.
Выставкадин махсус отдел Дербентдин панорамадин акунриз, анин цлариз, Нарын-къеледиз, тарихдин жуьреба-жуьре вахтара къадим шегьердиз мугьман хьайи полководецрин, сиягьатчийрин, алимрин, писателрин шикилриз ва абурун гьакъиндай делилриз бахшнава.
Дербентдин государстводин тарихдинни архитектурадин ва художественный музей-заповедникди тешкилнавай и выставкадиз Костромадин агьалияр 15-апрелдалди килигда.
* * *
Яргъал тир Индонезиядин меркез Джакартада “Россияда Исламдин адетар” лишандик кваз ачухнавай шикилрин международный выставкадин разделрикай сад къадим Дербентдиз талукьарнава. Ана Россияда лап куьгьнеди тир Дербентдин “Жуьмя мискIиндин”, Пак Мугьаммад Пайгъамбардин ﷺ терефдарар тир 40 векил кучукнавай Къирхляр сурарин ва маса шикилар къалурнава.
Ракьун рекьерин тарихдикай
Бажарагълу тешкилатчи, вичин уьмуьрдин ва зегьметдин гзаф йисара Дербентдин ракьун рекьин карханайра, гьа жергедай яз “Араблинская” станциядин начальниквилени баркалладин таж алаз кIвалахай Гьажиагъа Мегьамедшерифован пайни кваз Дербентда Кеферпатан Кавказдин ракьун рекьин тарихдин музей ачухнавайдакай “Лезги газетди” кхьенай.
Общественный бинейраллаз музейдин директорвиле кIвалахзавай. Гь.Мегьамедшерифова чаз хабар гайивал, ракьун рекьин хазинадиз элкъвенвай аникай шегьерэгьлийрин ва мугьманрин рикI алай чка хьанва.
Музейдин экспонатрин кьадар къвердавай артух, тарихдин маса музейрихъ галаз къадим Дербентдин алакъаяр мягькем жезва.
Нариман Къарибов
