Алай йисан 18-мартдиз Махачкъалада, Урусрин драмтеатрдин чIехи залда, Яран сувариз талукьарна  кьиле тухвай концертдиз тамашайла, зун и чар кхьиниз мажбур хьана. Ихьтин мярекат жедайдакай 10-20 югъ виликамаз хабардарнавай.  Зун хьиз чи хейлин маса ватандашарни, са агъзур манат пул гана, билетарни къачуна, гьазур хьана и межлисдиз физ (пулунин тIвар кьуна лугьуз инжиклу тахьурай а мярекат тухвай ксар).

Ингье концерт башламишна кIанзавай вахтни (нянин сятдин 7) хьана. Са 20 декьикьада кьван эглеш хьайидалай гуьгъуьниз башламиш хьана концерт. Сегьнедиз Руслан Пирвердиев экъечIна. Гьа сифтедилай ада лагьана: “Зун урус чIалал рахада (рахурай, гьамни чаз чизвай чIал я — авт.), гьикI хьи, и залда маса миллетрин векиларни ава”.

Дугъриданни, аваз хьана. Кьилди къачур­тIа, РД-дин культурадин министр З.Бутаева. Пагь инал министрдилай авур кьван тарифрин ван хьана кIандай квез. Амни гьич. Концерт, сифте мани ягъуналди, чи рикI алай ма­нидар, РД-дин халкьдин артистка Ф.Зейналовади ачухна. Гьа и ханумдини тамашачияр шадарнач. Ада туьркверин аваздалди  са вуч ятIани яна (фонограмма кваз). Гьайиф!..

Концерт башламиш хьайи чIавалай Р.Пир­вердиева тамашачийривай капар ягъун­ тIалабзавай. Гьа и тIалабун ада са виш сеферда кьван тикрарна жеди. А капар рикI шад хьайила, сегьнедиз экъечIай манидарди халкьдин рикIив рикI агудайла, ахпа къведайди я, гьуьрметлу Руслан Пирвердиев.

Чи машгьур манидарар тир Ирадади, Ди­ляради, Маринади, Мегьамеда, Брембега… сада кьванни, халкьдин вилик экъечIна, дуьз­гуьндаказ халкьдин мани янач. Зун критик туш, муаллим я. Бес куьне, и зурба залда халкь кIватIайла, жемятдин вилик вуч гваз экъечIна? Куьне кларнет, далдам гъилерал  къугъурун (“Штул”, “Восток” виа-яр) тIимил я эхир. Куьн мехъеррик физ (къуй мехъерар гзаф хьурай, далдамни зуьрне галаз) вердиш­ хьанва, “Ямаха” лугьудай алатдал ягъиз­. Бес идан эхир мус хьурай.

Аламат хьайи кар ам я хьи, къвалав ацукьнавай хтулди (бинедилай шегьерда яшамиш жезвай) завай хабар кьазва: “Я ими, ина ашукьар кьванни авайди тушни?!” Завай жаваб гуз хьанач. За инал садазни акьулар гузвайди туш. Амма и келимаяр лугьун таву­нани жедач. Я чан яратмишзавай ксар! Куьн халкьдин вилик экъечIдайла, чантадиз килиг, ана аваран са затI аваз жедайвал ая.

РикI динждай кьве карни хьана и Яран суварин концерт тухудай чIавуз. Сад лагьай­ди, сегьнедал кьве кваса экъечIайла, залдик шадвилин юзун-гьерекат акатна, абуру авур ихтилатри тамашачийрин гуьгьуьлар ачухарна. Мадни са хъсан кар: чи рикI алай жегьил шаир Владик Батманова дидедиз бахшнавай шиир кIелайла, кьилин чIарар цаз-цаз хьана акъвазна зи.

РикIе лугьудай гафар гзаф ава. Сегьнедиз экъечIна, тар, чIагъан, зуьрне ядай лезгияр чахъ амачни?! Мадни инал лугьун тавуна жедач. Чи рикI алай композитор, тарчи, къени инсан Падишагь Киберова (сура нур хьуй вичин) гьикьван рикIиз хуш жедай макьамар, манияр туькIуьрна. Адан гададини (Р.Киберов) бубадин ирс давамарда лагьана умуд квай. Суварин межлисдин сегьнедал экъечIна, ада са макьам яна (фонограмма): я туьркверинди тушир, я — индусринди. Куь­рел­­ди, са хирде-гъуруш.

Вучиз и мярекатда чаз я Т.Мамедован, С.Гьажиевадин, я Д.Къазиеван, Н.Жамаловадин ва мсб. сесинин ван хьанач?

Мад сеферда тIалабзава чи рикI алай лезги театрдин коллективдивай,  манидарривай, музыкантривай: халкьдин вилик, хъсандиз гьазур хьана, уьзягъ жедайвал экъечI.

За умуд кутазва хьи, кьурай булахриз ятар хкведа.

Н.Мирзегьасанов, муаллим. Махачкъала шегьер