9-13-апрелдиз Астраханда, «ВикIегьвилин ордендин» сагьиб, чIехи сержант Ифрат Бурбаеван экуь къамат рикIел хкуниз талукьарна, жегьил спортсменрин арада боксдай Вирироссиядин турнир кьиле фена.

Сулейман-Стальский райондин администрациядин пресс-къуллугъди «Лезги газетдиз» хабар гайивал, акъажунра Дагъустандай 12 командади, гьа жергедай яз КIварчагъа тренер Альберт Межидован регьбервилик кваз боксдал машгъул жаванрини иштиракна.

ИкI, КIварчагъвийрин командадай Ислам Шикерхановани Джанбулат Къагьриманова 1-чкаяр кьуна, кьвед лагьай чкаяр – Мурад Гьажихановани Мирзамегьамед Абдулвагьабова. Кирсан Мегьамедова 3-чка кьуна.

Къейд ийин, акъажунра 27 командади (санлай 278 боксерди) иштиракна.

 «Лезги газет»